“Sabah” dünən “Neftçi”nin futbolçusu Elvin Camalovla bağlı yaydığı məlum bəyanatda bir çox məqamdan bəhs etsə də, sabiq kapitanın hansı oyunçuya qeyri-etik təklif etdiyini açıqlamadı. O bəllidi ki, həmin futbolçunun klubla müqaviləsi növbəti mövsümü də əhatə edir.

“Football-plus.az” bu ipucudan istifadə edərək həmin futbolçunun kim ola biləcəyinə aydınlıq gətirdi.

Belə ki, “bayquşlar”la müqaviləsinin müddəti növbəti mövsümün sonunda başa çatacaq futbolçular Yusif İmanov, Nicat Mehbaliyev, İqor Noqeyra, Ayaz Quliyev, Cesse Sekidika və Pavol Şafrankodu. Bilindiyi kimi, qapıçılar Yusif və Nicat Masazır təmsilçisinin Stas Pokatilovu transfer etməsindən sonra start heyətindəki yerini itirib. Düzdü, Ayaz Quliyev ötən “futbol ili”ndə komandanın aparıcı simalarından idi. Lakin cari mövsümdə zədə üzündən cəmi 6 matçda meydana çıxa bilib. Mərkəz müdafiəçisi İqor Noqeyra da aparıcı oyunçular sırasında deyil. Ümumiyyətlə, böyük ümidlərlə kollektivə cəlb edilən braziliyalının mövqeyindəki problemlərə çarə ola bilmədiyi sirr deyil. Beləliklə, “Sabah”ın Pavol Şafrankonu nəzərdə tutduğunu düşünmək olar. Mərkəz hücumçusu həm də sağ və sol cinah yarımmüdafiəçisi kimi çıxış etmək iqtidarındadı. O, cari mövsümdə meydana çıxdığı 28 premyer-liqa matçında 7 qol, 1 məhsuldar ötürmə ilə yadda qalıb. Slovakiyalı həm də yetərincə intizamlı oyunçudu, bu mövsüm cəmi bir sarı vərəqəylə üzləşib. Bu üzdən başqa klubların, eləcə də “Neftçi”nin diqqətini çəkməsi normaldı.

Maraqlıdı ki, mətbuatda həmin futbolçunun məhz Cesse Sekidika olduğu haqda iddialar var. İş orasındadı ki, nigeriyalının klubla müqaviləsinin müddəti “2+1 il”di. Yəni 2023-cü ilin yayında alınan nigeriyalı 2023/24 mövsümünü yaxşı keçirdiyinə görə müqavilə müddəti avtomatik bir il uzadılıb, 2026-nın yayına qədərdi. Yeri gəlmişkən, Sekidika 29 premyer-liqa matçında 10 qol, 3 məhsuldar ötürmə ilə yadda qalıb.

KƏNAN BAHADIR