Mövsümə yaxşı başlamasına baxmayaraq, son 5 turda nə qol vuran, nə də məhsuldar ötürmə verən Sebastyan Şimanskinin oyunundakı eniş “Fənərbaxça”nı narahat etməyə bilməz.

Ümumi fikir belədi ki, qış fasiləsində bir sıra aparıcı Avropa klublarının hədəfinə düşdükdən sonra 24 yaşlı yarımmüdafiəçi oyunlara köklənməkdə çətinlik çəkir. “Fənər” rəhbərliyi ona maraq göstərən klublarla heç danışıqlar masasına da əyləşmək istəməyərək loru dildə desək, onların hamısına “gedin, mövsümün sonunda gələrsiz” dedi. Bu arada “Mançester Yunayted”, “Tottenhem”, “Kristal Pelas” və “Everton” kimi klubların hədəfində olan Şimanskiyə maraq göstərənlərin sırasına bundesliqanın lideri “Bayer-04” də qoşulub. Leverkuzenlilərin rəsmisi Slavomir Çarnieki də bu futbolçuya maraq göstərdiklərini təsdiqləyib: “Şimanskinin yaxınları ilə təmasdayıq. Skautlarımız onu ciddi şəkildə təqib edir. Böyük ehtimalla mövsümün sonunda bəzi futbolçularla vidalaşmalı olacağıq. Hansı mövqelərin boşalacağını bilmirik, amma Şimanski potensial transfer hədəfimizdi. Onun nəyə qadir olduğunu gözəl bilirəm. “Fənərbaxça”dakı performansı da göstərir ki, bu futbolçu yeni səviyyəyə və daha rəqabətcil bir liqada oynamağa hazırdı”. Şimanskinin bu mövsüm 38 rəsmi matçda 12 qol, 14 məhsuldar ötürməlik performans sərgilədiyini bildirək.

“Fənər”dən söz düşmüşkən, bir xəbəri də diqqətinizə çatdıraq. Gözlənildiyi kimi, İstanbul nəhənginin məşqçilər korpusuna yeni isim əlavə olunub. Söhbət xorvatiyalı qapıçılar üzrə məşqçi Sandro Zufiçdən gedir. Rəhbərlik bu addım ilə hələ ki ümidləri doğrultmayan və uzaq məsafələrdən buraxdığı qollara görə tənqid olunan qapıçı Dominik Livakoviçin performansını artırmaq istəyir. Zufiç bu qapıçını gözəl tanıyır. Belə ki, onlar daha öncə 3 il Zaqreb “Dinamo”sunda birlikdə çalışıb. 44 yaşlı Zufiç cari mövsümə Türkiyənin digər təmsilçisi “Trabzonspor”da başlamışdı. Belə ki, o, Nenad Byelitsanın köməkçilərindən biri idi. Amma oktyabrın 12-də Trabzon təmsilçisi xorvatiyalı mütəxəssislə yolları ayırdı. Byelitsa hazırda “Union”u çalışdırsa da, Zufiç oktyabrdan bəri işsiz idi.