Ən son ''İstanbul BŞ''ni yenərək uğursuzluq zolağından çıxan, amma hələ də lider ''Qalatasaray''dan 6 xal geridə olan ''Fənərbaxça''da zədə epidemiyası davam edir.

Başakşəhərlilərlə qarşılaşmada birdən-birə 3 isim - Livakoviç, Bekao və Oğuz Aydın zədələndi. Ötən mövsüm də buna bənzər durum üzündən bir xeyli çətinlik çəkən İstanbul nəhəngində son zədələr vəziyyəti yenə qəlizləşdirib. Joze Mourinyo da mətbuat konfranslarında tez-tez bu problemi qabardır.

''Fənərbaxça'' mövsümə 26 nəfərlik heyətlə başlamışdı və geridə qalan 4 ayda bu heyətin 58 faizi zədələrdən əziyyət çəkib! Qapıdan hücuma qədər bütün mövqelərdə indiyə qədər 15 fərqli futbolçu ümumilikdə 22 dəfə zədə alıb. Təkcə Osayi-Samuel ilə Ciku hərəyə 3 dəfə zədələnib. Sen-Maksimen, İrfan Can Eğribayat və Çağlar Söyüncü iki dəfə zədələnib. İndiyə qədər yalnız Cenk Tosun, Ən-Nəsiri, Ceko, Kostiç, Amrabat, Ləvənt Mercan, Tadiç, Bartuğ Elmaz, Şimanski, Mərt Müldür və Ərtuğrul Çətin xəstə olduqları dönəmi nəzərə almasaq, zədələnməyiblər. Yeri gəlmişkən, Oostervoldenin ardından Bekao üçün də mövsüm başa çatdı!

Üstəlik ''Atletik''lə oyunda yol verdiyi kobud səhvdən sonra gözdən düşən Samet Akaydının da taleyi bəlli deyil. Yəni indidən əminliklə söyləmək olar ki, ''Fənər'' qış transfer dönəmində həm müdafiənin mərkəzini, həm də sol cinahını gücləndirməyə çalışacaq. Müdafiənin mərkəzinə əsas namizəd Merih Dəmiraldı. ''Fənər''in öz yetirməsi olan Türkiyə yığmasının üzvü hazırda karyerasını Səudiyyə Ərəbistanı təmsilçisi ''Əl-Əhli''də davam etdirir. Amma Merihin dəyəri baha olduğundan ''Fənər'' onu yalnız icarəyə götürməyə çalışacaq.

Sol cinah üçün namizədlər isə ''Bolonya''lı Xuan Miranda, ''Leççe''li Antonio Qallo, ''Tottenhem''li Serxio Reqilyon və ''Atletiko''lu Reynildo Mandavadı.

ƏLİ