İspaniyalı forvarddan illər sonra gələn etiraf: ''Fənər''i seçməklə səhvə yol verdim''
44 yaşı olmasına baxmayaraq hələ də karyerasını başa vurmayan və hazırda İspaniyanın ''Rotena'' adlı həvəskar klubunda forma geyən Daniel Quisa İspaniya mətbuatına son açıqlamasında diqqətçəkən ifadələr işlədib.
İspaniyalı bu forvard məlum olduğu kimi 2008-ci ilin yayında böyük ümidlərlə 14 milyon avro qarşılığında ''Malyorka''dan ''Fənərbaxça''ya transfer olunmuşdu. Özü də 2007/08-də o, ''Malyorka''nın heyətində vurduğu 27 qolla La Liqanın bombardiri olmuş, üstəlik həmin yay İspaniya yığması ilə Avropa Çempionatını qazanmışdı.
Hər kəs bu futbolçunun Türkiyədə qolları sıralayacağını gözlədiyi halda heç də belə olmadı. Quisa ''sarı-lacivərdlilər''də 3 mövsüm ərzində meydana çıxdığı 98 rəsmi oyunda aktivinə yalnız 35 qol, 21 məhsuldar ötürmə yaza bildi. Quisa son açıqlamasında həmin dönəm Türkiyəyə gəlişinin yanlış qərar olduğunu etiraf edib:
''Geriyə boylananda karyeramla bağlı bir sıra peşmanlıqlarım var. DÇ-2010-a yollana bilməmək hər zaman qəlbimdə bir yara kimi qalacaq. Bundan başqa 2008-ci ildə ''Betis''in təklifini geri çevirərək ''Fənərbaxça''ya yollanmağı da özümə bağışlaya bilmirəm. Qəlbimi və duyğularımı dinləmək əvəzinə daha çox pul qazanmağa üstünlük verdim. İndiki ağlım olsa, düşünmədən ''Betis''i seçərdim. Amma 2008-də fərqli qərar verməklə çox böyük bir səhv etdim. Sonradan anladım ki, həyatda pul heç də hər şey demək deyil. O cür fürsəti qaçırmaq canımı cox yandırdı''.
Digər xəbərlər
