UEFA-nın Hakimlər Komitəsi gec də olsa hakim səhvini etiraf edib.

Qitə futbol qurumu AÇ-2024-ün 1/4 finalının Almaniya - İspaniya oyununu (1:2) idarə edən Entoni Teylorun səhv qərar verdiyini təsdiqləyib.

Xatırladaq ki, iyulun 5-də Ştutqartda keçirilən matça əlavə edilən vaxtda cərimə meydançasında top ispaniyalı müdafiəçi Mark Kukurelyanın əlinə dəysə də, referi penalti təyin etməmişdi. İspaniya yığması Mikel Merinonun 119-cu dəqiqədə vurduğu qolla qitə çempionatının yarımfinalına çıxmışdı. UEFA həmin oyundan iki aydan da çox vaxt keçəndən sonra Teylorun İspaniyanın qapısına penalti təyin etməmək qərarını səhv kimi tanıyıb: “Oyunçunun əlinin bədənə çox yaxın olduğu hal istisna olmaqla əksər belə vəziyyətlərdə penalti təyin olunmalıdı. Müdafiəçi İspaniya - Almaniya oyununda topun qarşısını bədənə çox da yaxın olmayan əli ilə kəsib”.

Əlavə edək ki, İspaniya yığması finalda İngiltərəyə də 2:1 hesabı ilə qalib gələrək tarixində 4-cü dəfə Avropa çempionu olmuşdu.