Sərgən Yalçın karyerasının ən yanlış qərarını açıqladı
Türkiyə futbolunun önəmli isimlərindən olan Sərgən Yalçın karyerası ilə bağlı əsas peşmanlığını dilə gətirib.
Bilindiyi kimi Sərgən Türkiyədə 4 nəhəngin hər birində forma geymiş ilk futbolçu kimi tarixə düşüb. İllər sonra bunu Burak Yılmaz da bacarmışdı. Amma Yalçın daha çox ''Beşiktaş''ın əfsanəsi sayılır.
Yetirməsi olduğu bu klubla o, həm futbolçu, həm də məşqçi kimi çempion olub. Sərgən ''qartal''ı ilk dəfə 1997-ci ildə tərk edərək sürpriz şəkildə ''İstanbulspor''a transfer olunmuşdu. 52 yaşlı futbol adamı ''Kafa Sports'' adlı ''yutub'' kanalına açıqlamasında məhz bu addımı karyerasının ən böyük səhvi adlandırıb:
''Futbol oynadığım dönəmdə ən səhv addımım hansı olub? Əslində səhv qərarlarım çox olub. Gənc ikən xarakterim elə idi ki, ağlıma nə gəldi edirdim. Ancaq ən böyük səhvim gənc yaşda ''Beşiktaş''dan ayrılmağım oldu. Bəlkə də həmin vaxt bu qərar mənə çox yanlış gəlmirdi. Amma bu gün geri boylananda deyə bilərəm ki, futbol həyatımın əsas səhvinə yol vermişəm. Düzdü, bu addım karyeramda enişə səbəb olmadı. Sonrakı illərdə də uğur qazana bildim. Amma indi əminliklə deyə bilərəm ki, ''Beşiktaş''dan ''İstanbulspor''a yollanmaqla ciddi səhvə yol verdim''.
Digər xəbərlər
