Bir dönəm ''Hatayspor''da çıxış etmiş və Türkiyə çempionatının bombardiri olmuş Aaron Bupendzadan şok xəbər gəlib.

Belə ki, qabonlu forvard Çində bir binanın 11-ci mərtəbəsindən düşərək dünyasını dəyişib! Ulduz futbolçunun şərəfini qoruduğu Çin təmsilçisi ''Jeiyanq''ın rəsmiləri bu faciəvi xəbər ortaya çıxana qədər onunla əlaqə qurmağa çalışsalar da, buna nail ola bilməyiblər.

Bu futbolçunun şübhəli ölümü ilə əlaqədar olaraq Çin polisi dərhal araşdırmaya başlayıb. Əldə edilən məlumatlara görə ölümündən bir qədər öncə Bupendzanın evinə onun qardaşı gəlibmiş. Onlar arasında bəlli olmayan bir səbəb üzündən münaqişə yaşanıb. İlkin ehtimala görə məhz bu münaqişə üzündən Bupendza özünü 11-ci mərtəbədən atıb. Amma bunun intihar, yoxsa təsadüfi ölüm olduğu hələ dəqiq bilinmir.

Qeyd edək ki, karyerasına Fransada start verən və qısa müddət Portuqaliyada da oynayan Bupendza 2020-ci ildə ''Hatayspor''la anlaşaraq Türkiyəyə gəldi. Həmin ana qədər çox da tanınmayan futbolçu Türkiyədə istedadını göstərərək böyük populyarlıq qazandı. 2020/21-də o, 22 qolla superliqanın bombardiri oldu. Həmin vaxt İstanbul nəhənglərinin də gündəmində yer alan istedadlı futbolçu 5 milyon dollar qarşılığında Qətər təmsilçisi ''Əl-Ərəbi''yə yollandı. Həmin vaxtdan bu yana Bupendza demək olar, hər il komanda dəyişməsi ilə diqqət çəkdi. ''Əl-Ərəbi''dən sonra o, ''Əl-Şabab'', ''Sinsinnati'', Buxarest ''Rapid''ində forma geymiş və son olaraq yanvarda Çin təmsilçisi ''Jeiyanq''la anlaşmışdı.

28 yaşlı oyunçu peşəkar karyerası ərzində 209 rəsmi oyunda iştirak edərək aktivinə 87 qol, 20 məhsuldar ötürmə yazmışdı. Bu mövsüm isə o, Rumıniya və Çində ümumilikdə 17 rəsmi oyuna 9 qol vurmuşdu.