“Sabah” bu gün ölkə kubokunun yarımfinal mərhələsinin cavab oyunları çərçivəsində “Neftçi”ni qəbul edəcək.

Xatırladaq ki, ilk oyunda “ağ-qaralar”ın meydanından 2:1 hesablı qələbəylə ayrılan “bayquşlar”ın hədəfi də rəqibi kimi kubok yoluyla avrokuboklarla yollanmaqdı. Bu üzdən matçın yetərincə əhəmiyyətli olduğu bəllidisə, azarkeş marağının yüksək səviyyədə olacağını proqnozlaşdırmaq çətin deyil. Dünən matçı tribunadan izləmək istəyənlərin və bu məqsəldə bilet alanların sayının 3000-ə yaxın olduğu xəbər vermişdik. Bu gün də bilet satışıyla bağlı son durumla maraqlandıq. Masazır təmsilçisinin mətbuat xidmətinin rəhbəri Elnur Həmidov “Football-plus.az”a açıqlamasında 3800 biletin satıldığını, qonaq komandaya isə 1100 biletin verildiyini dedi. Bu o deməkdi ki, tribunalarda azı 5000-ə yaxın azarkeş olacaq.

Bu arada bilet satışı davam edir. Oyunu tribunadan izləmək istəyənlər “iTicket.az” saytından və “Bank Respublika Arena”nın kassalarından bilet əldə edə bilər. Maraq üçün qeyd edək ki, matçın keçiriləcəyi stadion 8600 yerlikdi.

Xatırladaq ki, “Sabah” – “Neftçi” oyunu saat 20.00-da “Bank Respublika Arena”da başlayacaq.

KƏNAN BAHADIR