Ölkəmizdə böyük futbol bayramının başlamasına 3 saatdan az qaldı. Azarkeşlərin hər üç avrokubok matçına ciddi marağı var. Matçlar zamanı stadionlarda, ardınca yollarda ajiotaj yaşanacağı gözlənilir. Start fitinə qalan zaman daraldıqca qarşılaşmaları tribunalardan izləyəcək tərəfdarların sayı da aydın olur.

“Qarabağ” – HİK oyununa artıq 18 min bilet satılıb. Satış hələ də davam edir. Qeyd edək ki, saat 20.00-da Tofiq Bəhramov adına Respublika stadionunda başlayacaq matçın biletlərinin qiyməti 5, 10, 20, 30, 75 və 100 manat təşkil edir. Satış məntəqələrini bir daha təqdim edirik: “İticket.az”in satış məntəqələri (iticket.az-da onlayn satış), “Park Bulvar”dakı “Qarabağ” fanşopu, Tofiq Bəhramov adına Respublika stadionunun kassaları.

“Bank Respublika Arena”da keçiriləcək “Sabah” – “Partizan” oyunu üçün də bilet satışı davam edir. Hələ ki 6 min nəfər bu xidmətdən yararlanıb. Biletləri stadionun kassasından, "İticket"in satış məntəqələrindən, həmçinin onlayn şəkildə "iticket.az" saytından əldə etmək mümkündü.

“Neftçi” – “Beşiktaş” qarşılaşması üçün isə bütün biletlər tükənib. “Ağ-qaralar”ın mətbuat xidmətinin rəhbəri Rüstəm Allahverdiyevin “Football-plus.az”a verdiyi məlumata görə, satışa çıxarılan 10000-ə yaxın bilet bitib. Qeyd edək ki, bunlardan 1000-i Beşiktaş, qalanı isə “Neftçi”azarkeşləri üçün nəzərdə tutulub.

KƏNAN BAHADIR