Tanınmış almaniyalı mütəxəssis Verner Lorant həyatının 77-ci baharında gözlərini əbədi olaraq yumdu. O, son ilyarımda ağır xəstəlikdən əziyyət çəkirdi.

''Football-plus.az'' xəbər verir ki, Lorant futbol dünyasında həm futbolçu, həm də məşqçi kimi iz buraxmağı bacardı. O, futbolçu kimi Dortmund ''Borussiya''sı, ''Hannover-96'', ''Şalke-04'', ''Ayntraxt''ın şərəfini qorumuş, frankfurtluların heyətində 1980-ci ildə UEFA kubokunu qazanmışdı. Məşqçi karyerasına 1984-cü ildə Almaniyanın aşağı liqa klublarında start vermişdi.

Məşqçi kimi ''Münhen 1860''ın başında qazandığı uğurlarla tək Almaniyada yox, Avropada da böyük populyarlıq qazandı. Burda işlədiyi 11 il ərzində klubu 3-cü bundesliqadan nəinki elitaya, hətta Çempionlar Liqasına da daşıya bildi. Amma 1999/00-də münhenlilər təsnifat mərhələsində ''Lids''ə uduzaraq qrup mərhələsinə vəsiqə qazana bilmədilər. Münhendən ayrıldıqdan sonra Lorant daha 15 klubda çalışdı. Amma heç yerdə 1 ildən artıq işləyə bilmədi.

Lorant xüsusilə Türkiyədə çox populyar idi. Düzdü, o, Türkiyədə çalışdırdığı klublar - ''Fənərbaxça'', ''Sivasspor'', ''Ərciyəsspor'' və ''Kasımpaşa''da titul qazana bilmədi. Amma Lorant hər zaman Türkiyə çempionatı tarixinin ən yaddaqalan oyunlarından birinin baş memarı kimi xatırlanacaq. 2002-ci ildə ''Fənərbaxça'' ''Qalatasaray'' üzərində 6:0-lıq tarixi qələbəni məhz bu məşqçinin başçılığı altında qazanmışdı. İstanbul nəhəngi onun dönəmindən keçirdiyi 39 rəsmi oyundan 23 qələbə, 8 heç-heçə, 8 məğlubiyyətlə ayrılmışdı.

Maraqlıdı ki, 6:0-dan cəmi 1 ay sonra Lorant uğursuz nəticələrə görə istefaya göndərilmişdi. Həm ''Fənərbaxça'', həm də klubun sabiq prezidenti Əziz Yıldırım Verner Lorantın ölümü ilə bağlı başsağlığı mesajı paylaşıb.