İngiltərə futboluna itki üz verib.

"Football-plus.az" xəbər verir ki, ölkənin əsas komandasının sabiq baş məşqçisi Terri Veneybls dünyasını dəyişib.

Tanınmış mütəxəssis noyabrın 25-də 80 yaşında vəfat edib. Ölüm səbəbinə aydınlıq gətirilməyib. Veneybls futbolçu həyatını 4 klubda keçirib: “Çelsi” (1960-66), “Tottenhem” (1966-69), “Kuinz Park Reyncers” (1969-74) və “Kristal Pelas”da (1974-75) çıxış edib. “Çelsi” ilə İngiltərə Liqa kubokunu (1965), “Tottenhem”lə ölkə kubokunu (1967) qazanıb. Sabiq yarımmüdafiəçi 1964-cü ildə İngiltərə yığmasında 2 oyun keçirib. Futbolçu karyerasını başa vurandan bir il sonra məşqçi fəaliyyətinə başlayıb. “Kristal Pelas” (1976-80, 1998-99), “Kuinz Park Reyncers” (1980-84), “Barselona” (1984-87), “Tottenhem” (1987-91), “Midlsbro” (2000-01) və “Lids” (2002-03) klublarını, İngiltərə (1994-96) və Avstraliya (1996-98) yığmalarını çalışdırıb, İngiltərə millisində (2006-07) köməkçi-məşqçi kimi də fəaliyyət göstərib. “Barselona” onun rəhbərliyi altında İspaniya çempionluğunu (1985), “Tottenhem” isə ölkə kubokunu (1991) qazanıb. İngiltərə yığması evdə 1996-cı ildə keçirilən Avropa çempionatında bürünc mükafata layiq görülüb. Veneyblsin komandası əsas və əlavə vaxtı 1:1 hesabıyla nəticələnən yarımfinal matçında Almaniyaya penalti seriyasında məğlub olub.

Maraq üçün penaltini qola çevirə bilməyən ingilis futbolçunun hazırda milli komandanı çalışdıran Qaret Sautqeyt olduğunu da xatırladaq.