Martın sonunda start götürən Braziliya çempionatının 2-ci turundan sonra maksimum nəticə göstərən komanda qalmamış, turnir cədvəlində 7 komandanın 4 xalla şərikli liderliyi formalaşmışdı. 3-cü turda şərikli liderlərin sayı 2-yə endi.

"Football-plus.az" xəbər verir ki, İlk iki oyunda 4 xal toplayan “Botafoqo” üçün hesabat turu uğursuz alındı. Son çempion “Braqantino”ya minimal hesabla uduzdu. Erkən buraxılan qola cavab verə bilməyən Renato Payvanın komandası ilk məğlubiyyətlə 10-cu yerə düşdü.

İlk turun ev oyununda “Botafoqo” ilə qolsuz heç-heçəyə razılaşan “Palmeyras” sonrakı matçlarında maksimum nəticə göstərdi. Ötən mövsümün vitse-çempionu “Sport Resife”dən (2:1) sonra “Korintians”ı da məğlub etdi. San Paulu derbisinin nəticəsini müəyyənləşdirən hər iki qol ilk hissədə vuruldu. Abel Ferreyranın komandası 7 xalla turnir cədvəlinin 2-ci pilləsinə yüksəldi.

Son mövsümün bürünc mükafatçısı “Flamenqo” da ilk turda bir xal qazanandan sonra azarkeşlərini ardıcıl ikinci qələbə ilə sevindirdi. Filipe Luisin komandası “Qremio”ya De Arraskaetanın dublu ilə qalib gəldi. Uruqvaylı yarımmüdafiəçi indi Veqetti (Vasku da Qama) ilə birgə 3 qolla bombardirlərin syahısına başçılıq edir. Xalını 7-yə çatdıran “Flamenqo” “Palmeyras”dan çox qol vurduğu üçün 1-ci yerdədi.

Artıq A seriyasında xalı olmayan komanda qalmayıb. Yeni mövsümün hər iki oyununda uduzan “Vitoriya” səfərdə “Atletiko Mineyro”dan bir xalı 2:2 hesablı heç-heçə ilə aldı.

“Vitoriya” kimi yüksək liqaya ötən mövsümün sonunda vəsiqə qazanan “Santos”un da hesabında 1 xal var. “Fluminense” ilə səfər oyununun son saniyələrində buraxılan yeganə qol “ağ-qaralar”ın növbəti məğlubiyyətini rəsmiləşdirdi. Qeyd edək ki, bu il doğma klubuna qayıdan Neymar zədə səbəbindən ölkə çempionatının yeni mövsümündə ilk dəfə meydana çıxdı. Mübarizəyə fasilədən sonra qoşulan 33 yaşlı hücumçu kobud oyunu və sarı vəqərə almasıyla yadda qaldı. Matçdan sonra isə rəhbərlik baş məşqçi Pedro Kayşinya ilə yolları ayırdı. Braziliya klubuna ötən ilin dekabrında təyinat alan 54 yaşlı portuqaliyalı A seriyasında uğursuz starta görə istefaya göndərildi. Baş məşqçi səlahiyyətlərini müvəqqəti olaraq Braziliya yığmasının sabiq futbolçusu Sezar Sampayo icra edəcək.

3-cü tur
Braqantino - Botafoqo RJ 1:0
Eduardo Saşa, 5.

Palmeyras - Korintians 2:0
Pikeres, 14. E.Martines, 19.

Qremio - Flamenqo 0:2
De Arraskaeta, 4; 67.

Fortaleza - İnternasyonal 0:0

Juventude – Seara 2:1
Mandasa, 45+1. Mateus Babi, 68 – Aylon, 41.

Vasku da Qama - Sport Resife 3:1
Veqetti, 32; 41. Rayan, 83 – Uqo Moura, 55-öz qapısına.

Bayya - Mirassol 1:1
Erik Pulqa, 40 – Qabriel, 17.

San Paulu - Kruzeyro 1:1
Ferreyra, 52 – Kayo Jorje, 65.

Fluminense - Santos 1:0
Samuel Şavyer, 90+6.

Atletiko Mineyro - Vitoriya 2:2
Vera, 57. İqor Qomes, 87 – Lukas Halter, 47. Mateuzinyo, 65.

1. Flamenqo 3 2 1 0 5-2 7
2. Palmeyras 3 2 1 0 4-1 7
3. Juventude 3 2 0 1 4-3 6
4. Vasku da Qama 3 2 0 1 5-5 6
5. Fluminense 3 2 0 1 3-3 6
6. İnternasyonal 3 1 2 0 4-1 5
7. Fortaleza 3 1 2 0 3-1 5
8. Seara 3 1 1 1 5-4 4
9. Korintians 3 1 1 1 4-3 4
10. Botafoqo RJ 3 1 1 1 2-1 4
11. Braqantino 3 1 1 1 4-4 4
12. Kruzeyro 3 1 1 1 3-5 4
13. Qremio 3 1 0 2 2-5 3
14. Bayya 3 0 3 0 4-4 3
15. San Paulu 3 0 3 0 1-1 3
16. Mirassol 3 0 2 1 3-4 2
17. Atletiko Mineyro 3 0 2 1 3-4 2
18. Santos 3 0 1 2 3-5 1
19. Vitoriya 3 0 1 2 3-6 1
20. Sport Resife 3 0 1 2 2-5 1

Bombardirlər: De Arraskaeta (Flamenqo), Veqetti (Vasku da Qama) - 3, Pedro Raul (Seara), Qabriel Talyari (Juventude), Pikeres (Palmeyras) - 2.