Edvin Kuç 24-cü dəqiqədə Aydın Bayramovun qapısından 2-ci qolu keçirəndə, yəqin ki, “Qarabağ” azarkeşləri qəlbinin dərinliyində çempionluq mahnıları oxumağa, telefona sarılıb bir-birini təbrik etməyə başladı. Axı gün də belə əlamətdar hadisə üçün çox münasib idi. Müasir “Qarabağ”ın uğurlarının memarı Qurban Qurbanov məhz həmin gün – aprelin 13-də 53 yaşını tamamlayırdı. Ardıcıl 4-cü, klubu tarixindəki 12-ci çempionluq necə də yerinə düşərdi?! Amma olmadı, “Qarabağ” camiəsi indi ən azı növbəti turu gözləməlidi.

Misli premyer-liqasının 3-cu turu əsasən qonaqlar üçün düşərli oldu. Meydan sahiblərindən yalnız “Turan Tovuz” qalib gəldi, “Kəpəz” heç-heçə etdi. Daha bir önəmli məqam turun üç geridönüş, əzmkar qələbə ilə yadda qalmasıdı. “Şamaxı” ilə “Turan Tovuz” 1, “Zirə” 2 topun əvəzini çıxa bildi.
Turun ilk oyununda “Səbail” lider son çempion “Qarabağ”ı qəbul etdi. “Dənizçilər”in qapısına qol vurmaq üzrə “ixtisaslaşan” Leandro Andrade bu matçda həm het-trik etdi, həm də məhsuldar ötürmə verdi. Ötən mövsüm martda çempionluğu təmin edən “Qarabağ” bu mövsüm artıq növbəti turda 12-ci çempionluğunu rəsmiləşdirə bilər.

“Səbail”dən isə danışmağa dəyməz. Bəlkə də Elvin Məmmədov üç oyunda 2 xal toplamağı uğur sayır. Amma yolun sonunda 1-ci liqaya yuvarlanmaq varsa, bunun nəyi uğurdu?!

Turun Tovuzda keçirilən mərkəzi oyununda nə baş verdi? Həmişə sakit görünən Kurban Berdıyev emosiyalarına heç cür hakim ola bilmədi. Belədə FİFA referisi Elçin Məsiyev onu cəzalandırmaqdan çəkinmədi. Amma oyunun taleyini bu yox, Pavol Şafrankonun gördüyü qırmızı vərərə həll etdi. Slovakiyalı hücumçu hesabda irəlidə olan “Sabah”ın taleyini müəyyənləşdirdi. Səfərdə, çılğın azarkeşlər önündə qələbə hesabını qorumaq çətin idi. Xüsusən də Vasili Berezutski kimi təcrübəsiz məşqçi üçün “Sabah” azarkeşlərinin qorxduğu başına gəldi. Fasilədən sonra daha böyük qüvvə ilə irəli atılan “Turan Tovuz” qısa zaman kəsiyində vurduğu iki qolla çox vacib qələbə qazandı. Bu qələbənin sonrdan tovuzluları həm də “Araz-Naxçıvan”a yaxınlaşdırdığı bəlli oldu. Son 8 oyunda qələbəyə həsrət qalan “Sabah”ın isə gözünü kuboka dikməkdən başqa yolu yoxdu.

Şənbə günü həm də “Sumqayıt”la “Şamaxı” üz-üzə gəldi. Ötən tur doğma azarkeşləri qarşısında “Neftçi”yə 2 cavabsız qolla uduzan Ayxan Abbasovun komandası 3 xal üçün əlindən gələni edəcəkdi. “Şirlər”in həm 9-cu pilləyə “yuvarlanmaq”, həm də 7-ci pilləyə yüksəlmək ehtimalı var idi. Meydan sahibləri fasiləyə üstün yollansa da, qələbəni qoruya bilmədi. Belədə “Şamaxı” “Sumqayıt”ı geridə qoymağı bacardı. Necə deyərlər, iştah diş altındadı. Hələ bir-iki pillə də irəliləmək olar.

Bazar günü keçirilən oyunlardan birincisində qapılara top vurulmadı. Amma 90 dəqiqə ərzində “Kəpəz”lə “Araz-Naxçıvan” arasında gərgin mübarizə getdi. Ümumilikdə oyunu iki hissəyə bölərdik. Birinci hissədə söz sahibi “Araz-Naxçıvan” idisə, ikincidə “Kəpəz” dominantlığı bacardı. Əslində bu 1 xal sayəsində “Səbail”dən bir qədər də uzaqlaşan “sarı-göylər”i artıq elitada yerini qorumaları münasibəti ilə təbrik etmək olar. Amma Gəncə kimi futbol şəhəri 9-cu yeri haqq edirmi – bu artıq başqa söhbətin mövzusudu.

Turun son matçında “Zirə” daha baxımlı oyun nümayiş etdirdi. “Neftçi” iki top önə çıxandan sonra “qartallar”ın belə geridönüş edə biləcəyinə inananların sayı az idi. Ancaq nə etmək olar? Samir Abasovun “Neftçi”si izaholunmaz özəlliklərə malikdi. Komanda önə çıxa, qəfil üstünlüyü əldən verə bilr, lazım olanda oyunun axarını dəyişməyi bacarmır. Nəticə isə belə - 2:4 hesablı acı məğlubiyyətdi. Halbuki qələbə “ağ-qaralar”ı 5-ci pilləyə yüksəldəcək, kubokun cavab görüşü ərəfəsində əlavə özünəinam qazandıracaqdı.

Misli premyer-liqası
4-cü dövrə, 30-cu tur
11 aprel
Səbail – Qarabağ 1:4
12 aprel
Turan Tovuz – Sabah 2:1
Sumqayıt – Şamaxı 1:2
13 aprel
Kəpəz – Araz-Naxçıvan 0:0
Neftçi – Zirə 2:4

1. Qarabağ 30 23 4 3 74-18 73
2. Zirə 30 18 4 8 51-25 58
3. Araz-Naxçıvan 30 14 10 6 30-23 52
4. Turan Tovuz 30 12 11 7 37-34 47
5. Sabah 30 7 15 8 40-40 36
6. Neftçi 30 8 11 11 30-40 35
7. Şamaxı 30 8 7 15 27-38 31
8. Sumqayıt 30 8 5 17 24-43 29
9. Kəpəz 30 7 7 16 24-53 28
10. Səbail 30 4 8 18 23-46 20

Bombardirlər: Leandro Andrade (Qarabağ) – 14, Cesse Sekidika (Sabah), Davit Volkov (Zirə) – 10, Felipe Santos (Araz-Naxçıvan), Salifu Suma, Rafael Utziq (hər ikisi “Zirə”) – 9.

Növbəti turun oyunları aprelin 18-20-si aralığında keçiriləcək: “Araz-Naxçıvan” – “Turan Tovuz”, “Sabah” – “Səbail”, “Qarabağ” – “Neftçi”, “Şamaxı” – “Kəpəz”, “Zirə” – “Sumqayıt”.

ƏSƏD SEYİDOV