Avropa Liqasının pley-offunda ''Fənərbaxça'' ilə qarşılaşan ''Anderlext'' həmin oyunda tribunalarda yaşananlara görə öz fanatlarını cəzalandırıb.

''Football-plus.az'' xəbər verir ki, İstanbuldakı ilk görüşdə ''Fənərbaxça''nın 3:0-lıq qələbəsi qeydə alınmış, Brüsseldəki cavab oyunu isə 2:2-lik bərabərliklə yekunlaşmışdı. Fevral 20-də baş tutan cavab görüşündə tribunadakı olaylar üzündən UEFA Belçika klubuna para cəzası vermişdi. Ancaq ''Anderlext'' rəhbərliyi tribunada baş verən özbaşınalıqlarla bağlı öz araşdırmasını aparmaq qərarına gəlmişdi.

Həmin araşdırma nəticəsində məlum olub ki, ''Anderlext''in 40 azarkeşi öz biletlərini türkiyəli fanatlara satıbmış! Rəhbərliyin qərarı ilə həmin 40 nəfərə bir il ərzində klubun stadionuna girişinə qadağa qoyulub. Halbuki həmin azarkeşlər buna qədər ''Anderlext''in demək olar, hər ev oyununa gəlirdilər. İddialara görə ''qara bazar''da satılan biletlərin qiyməti hətta 500 avroya qədər çatıb. Bunun həm də əvvəlcədən planlaşdırılmış bir ticarət olduğu üzə çıxıb. Həmin 40 azarkeşdən başqa ''Anderlext'' rəhbərliyi tribunada yaşanan olaylarda yaxından iştirak edən daha 10 nəfəri də cəzalandırıb. Onlar da bir müddət stadiona buraxılmayacaq. Yəni ''Fənər''lə oyuna görə ''Anderlext'' ümumilikdə 50 azarkeşinə cəza verib.