Fevralın 20-də Avropa Liqasında da pley-offun cavab oyunları keçiriləcək. ''Fənərbaxça'' həmin gün Belçikanın paytaxtı Brüsseldə meydana çıxacaq.

İlk görüşdə öz meydanında ''Anderlext''i 3 cavabsız qolla məğlub edən İstanbul nəhəngi bu dəfə bu rəqiblə səfərdə qarşılaşacaq. Bu arada Belçikanın paytaxtında bu oyunla bağlı təhlükəsizlik tədbirlərinin gücləndirildiyi bəlli olub.

Məsələ burasındadı ki, son vaxtlar Brüsseldə tez-tez silahlı atışmalar müşahidə olunur. Atışmalar fevralın 5-də ''Klemanso'' metro stansiyasında başladı. Həmin gün iki silahlı şəxs metronun girişində hara gəldi atəş açmağa başladı.

Xoşbəxtlikdən heç kim xəsarət almadı. Fevralın 6-da, 7-də, 15-də və son olaraq 17-də də atışmalar baş verdi. Fevralın 15-dəki atışmada 19 yaşlı bir gənc güllələndi. Bu hadisələr üzündən yerli əhali hava qaraldıqdan sonra küçəyə çıxmağa çəkinir.

Bütün bunlar nəzərə alınaraq ''Fənərbaxça'' ilə oyun yüksək riskli qarşılaşma elan edilib. Orta Brüssel Bölgəsinin təhlükəsizlik xidmətinin göstərişi ilə şəhərin ən önəmli nöqtələrində polislərin sayı artırılacaq.

''Anderlext''lə qarşılaşmada tribunada ''Fənər''i 920 azarkeşin dəstəkləyəcəyi gözlənilir. Son qərara əsasən həmin 920 azarkeş metroya buraxılmayacaq. Onlar şəhərin müəyyən hissəsindən xüsusi ayrılmış avtobuslarla stadiona gətiriləcək.

ƏLİ