Türkiyənin peşəkar liqalarında klubların sayı azaldılacaq
Türkiyə Futbol Federasiyası peşəkar liqalarla bağlı qəbul etdiyi yeni qərarı açıqlayıb.
''Football-plus.az'' xəbər verir ki, bu qərara əsasən peşəkar liqalarda klubların sayı azaldılacaq. Hazırda Türkiyənin 4 peşəkar liqasında ümumilikdə 139 kollektiv mübarizə aparır.
Yeni plana görə onların sayı 120-yə endiriləcək. Mərhələli şəkildə həyata keçiriləcək bu prosesə 2027-ci ildə yekun vurulacaq. 2027/28-də superliqada 18, 1-ci liqada 18, 2-ci liqada 36, 3-cü liqada isə 48 klub olmaqla ümumilikdə 120 kollektiv çıxış edəcək.
TFF-nin rəsmi saytında bununla bağlı paylaşılan xəbərdə bunlar qeyd olunub:
''TFF-nin idarə heyəti tərəfindən aprelin 16-da keçirilən toplantıda peşəkar liqalardakı klubların sayının azaldılması ilə bağlı qərar qəbul edilib. Peşəkar liqalarda bildiyiniz kimi 2019/20-də 125 klub mübarizə aparırdı. Həmin vaxt Covid-19-un yaratdığı çətinliklər üzündən bəzi klubların aşağı liqaya düşmənin qaldırılması ilə bağlı tələbi qəbul edilmişdi. Bu üzdən 2020/21 mövsümündə peşəkar liqalarda artıq 145 klub mübarizə aparmışdı. Həmin mövsüm 21 klubla oynanılan superliqa da daxil olmaqla klubların sayının mərhələli şəkildə azaldılması planlaşdırılırdı. Amma bu dəfə 2023-cü ildə baş verən zəlzələ üzündən bəzi klubların aşağı liqaya düşmənin ləğvi ilə bağlı tələbi yenə qəbul edilmişdi. Bu üzdən klub sayının mərhələli şəkildə azaldılması planlaşdırıldığı kimi getmədi. Amma gəlirlərin artırılması və rəqabətin bir qədər də gücləndirilməsi baxımından 2025/26-da 139-a bərabər olacaq peşəkar liqalardakı klub sayının yenidən mərhələli şəkildə azaldılması prosesinə başlayacağıq. Bu proses 2027-ci ildə kollektivlərin sayının 120-yə endirilməsi ilə başa çatacaq".
Digər xəbərlər
