AFFA İcraiyyə Komitəsinin dünən keçirilən iclasında verilən qərarlar futbol ictimaiyyəti tərəfindən rəğbətlə qarşılandı. Eləcə də biz “ağa ağ, qaraya qara” demək prinsipiylə yanaşmaqla bu addımlarda hansısa xoşagəlməz detala rast gəlmədiyimizi bildirmək istəyirik. Lakin bir qaranlıq məqam var ki, buna aydınlıq gətirmək vacibdi.

Söhbət 2-ci liqa ilə bağlı məsələlərdən gedir. Belə ki, 2024/25 mövsümündə 1-ci liqada sonuncu yeri tutmuş klub 2-ci liqaya düşəcək, 2-ci liqadan isə ilk üç yeri tutmuş komanda birbaşa 1-ci liqaya yüksələcək. 1-ci liqada 9-cu yeri və 2-ci liqada 4-cü yeri tutan komandalar arasında neytral meydanda bir oyundan ibarət pley-off matçı keçiriləcək. Qalib komanda 1-ci liqada mübarizə aparmaq hüququ qazanacaq.

Belədə ağla sual gəlir: 2-ci liqada komanda sayı azalacaqmı? Axı 2-ci liqada 14 komandanın olması üçün Region Liqasından da kollektivlər gəlməlidi. Lakin bu çempionatdan hələ əsər-əlamət yoxdu.

Bu məqama “Football-plus.az” üçün AFFA-nın Mətbuat və İctimaiyyətlə Əlaqələr Departamentinin rəhbəri Elnur Məmmədli aydınlıq gətirdi. Qurum rəsmisi saytımıza açıqlamasında komanda sayında dəyişiklik olmayacağını, Region Liqasından yeni kollektivlərin gələcəyini dedi. Bəs, bu çempionat nə vaxt başlayacaq? Elnur bəyin dediyinə görə, bu haqda məlumat veriləcək.

KƏNAN BAHADIR