“Qarabağ” 5 milyon tələbindən çəkildi, “Sevilya” məbləği 3,5 milyona qaldırdı
“Sevilya”nın “Qarabağ”ın şərəfini qoruyan Juninyonu heyətin qatmaq isitədiyini yazmışdıq.
Xatırladaq ki, İspaniya təmsilçisi braziliyalı hücumçu üçün “köhlən atlar”a 2 milyon avro təklif etsə də, sövdələşmə baş tutmayıb. Ona görə ki, ağdamlılar bacarıqlı mərkəz hücumçusunu daha baha qiymətə satmaq istəyir. Bu məsələ ilə bağlı xeyli məqama toxunmuşuq. Lakin geridə qalan günlərdə müəyyən yeniliklər baş verib ki, bunları da nəzərinizə çatdırmağı lazım bildik.
Məlumdu ki, Juninyo “Qarabağ” üçün vacib fiqurdu. Avropa Liqasının əsas mərhələsində uğur qazanmağa çalışan komanda bu futbolçu sayəsində meydana daha ümidli çıxa bilər. Lakin söhbət oyunçunun baha qiymətə satılmasından gedir ki, burda maraqlar fərqlidi. Hər halda, “köhlən atlar” “Sevilya”dan tələb etdiyi məbləği ala bilsə, ölkə futbolunda ciddi uğura imza atacaq.
Düzdü, rəsmi məlumat deyil, lakin iddialara görə klub Juninyonun satışından azı 5 milyon avro qazanmaq istəyir. Axı işin strateji tərəfi də var. “Qarabağ” maliyyə gücünə güc qatsa, Juninyonun boşluğunu daha asan dolldura biləcək. Futbolçuya ödəniləcək məbləğ isə La Liqada onun haqda fikrin formalaşmasında ciddi rol oynayacaq. Reallıq oldu ki, istər klub rəhbərliyi, istərsə də baş məşqçi yüksək məbləğ ödənilən oyunçunun performansını diqqətdə saxlayacaq. Həmçinin belədə meydana çıxmaq üçün daha çox şans qazanacaq. Axı nəinki klubların maliyyə məsələlərinə məsul departamentləri, eləcə də azarkeşləri bu tipli transferlərlə yaxından maraqlanır, hadisələrin axarına uyğun dəyərləndirmələr edir. İspaniya mətbuatında artıq “Sevilya” ilə “Qarabağ” anlaşa bilərsə, futbolçunun yeni klubu ilə ikiillik müqavilə bağlaması gözlənilir. Futbolçu “Estadio Deportivo”ya açıqlamasında La Liqa klubunun təklifiylə bağlı qısaca belə deyib:
“Hazırda bu barədə çox danışa bilmərəm. Çünki məndən əvvəl klubum var. Bu, təkcə məndən asılı olan məsələ deyil”.
Bəli, həm “Qarabağ” rəhbərliyi, həm də Qurban Qurbanov bu transferin reallaşmasından yanadı. Amma şərtlər uyğundusa... İş orasındadı ki, ispanların ilk təklifi “köhlən atlar”ı qane etmir. Ötən sayımızda yazdığımız kimi, danışıqlar prosesinin ilkin mərhələsi başa çatıb. İndi “Sevilya” ikinci, dəqiq desək, qaneedici təkliflə çıxış etməlidi ki, ağdamlılar transferə daha isti yanaşsın. Lakin menecer Tural Əsgərlinin "Football-plus.az"a verdiyi məlumata görə, prosesin ikinci mərhələsi başlamayıb.
Görünür, “Sevilya” susur. Daha doğrusu, İspaniya mediasında bununla bağlı da cəlbedici məqamlar var. Belə ki, həmkarlarımızın iddiasına inansaq, “Qarabağ” 5 milyon avro tələbindən bir qədər geri çəkilib, “Sevilya” isə Ağdam klubuna 3 milyon və bonus şəklində daha 500 min avro təklif edir. Bunlar gerçəkdisə, onda tərəflərin anlaşacağı gün uzaqda deyil. “Sevilya”nın baş məşqçisi Xavyer Qarsiya Pimyenta isə belə deyir:
“Mən bilirəm ki, o, “Qarabağ”ın çox qol vuran futbolçusudu. Qış “transfer pəncərəsi” açılandan sonra hər şey baş verə bilər. Siz məndən “Qarabağ”ın futbolçusu barədə soruşursuuz. Bildiyimə görə, o, çox qol vurur və klubu ilə hələ uzunmüddətli müqaviləsi var. Fasilədən qayıdandan sonra heyətimizi qiymətləndirmək üçün bir ay vaxtımız olacaq”.
Qısası, “Sevilya” da gözləyir, “Qarabağ” da. Hadisələrin axarının nə ilə nəticələnəcəyini qarşıdakı günlərdə, böyük ehtimalla, yanvarın əvvəlində biləcəyik. Dəqiq olan məsələ isə artıq əvvəlki Juninyonun olmayacağıdı. Onsuz da ötən mövsüm qazandığı uğurlardan sonra aldığı təkliflər hücumçunun fikirlərini xeyli qarışdırıb. Danışıqların növbəti dəfə uğursuzluqla nəticələnməsi “Qarabağ”ın Çempionlar Liqasının əsas mərhələsinə vəsiqə qazana bilməməsinin ardınca performansında eniş hiss olunan braziliyalını daha da ruhdan sala bilər. Bunu ən yaxşı Qurban Qurbanov dərk edir.
Odu ki, “Sevilya” əlini cibinə salsa, yaxşıdı. Yoxsa “Qarabağ” Əli aşından da olacaq, Vəli aşından da...
KƏNAN BAHADIR
Digər xəbərlər
