“Qarabağ” səfərdə “Səbail”i məğlub edib Misli premyer-liqasının 2022/23 mövsümünün çempionu oldu. “Köhlən atlar” çempionluğu çoxdan təmin edə bilərdi. Lakin mövsümün sonlarına doğru heyətdə baş verən problemlər bunu gecikdirdi.

Bəs növbəti mövsüm Ağdam təmsilçisini nə gözləyir?

İndiki heyət Çempionlar Liqasının təsnifat mərhələsində, premyer-liqada və ölkə kubokunda mübarizə aparmağa qadirdi? Ağdam təmsilçisini yeni mövsümdə hansı dəyişikliklər gözləyir? Bu suallara aydınlıq gətirməyə çalışacağıq.

Komandanı tərk etmək ehtimalı olanlar

“Qarabağ”la vidalaşmağa üç namizəd var. Söhbət Ramil Şeydayev, Riçard Almeyda və Filip Ozobiçdən gedir. Milli üzvlərinin Ağdam təmsilçisi ilə müqaviləsinin müddəti iyunun 30-da başa çatır. Şeydayevin adı əsasən “Rostov”la yanaşı hallanır. Lakin vinger şəxsi “instaqram” hesabında “Qarabağ”ın formasındakı şəklinin üstünə qum saatı əlavə edərək izləyiciləri ilə paylaşıb. Burdan başa düşmək olar ki, ağdamlılar milli üzvünü razı salıb.

Ozobiçlə bağlı vəziyyət isə fərqlidi. Yarımmüdafiəçi əsas heyətdəki yerini itirib. Karyerasının son illərində daim oynaya biləcəyi komandada çıxış etmək istəyir. Ozobiç premyer-liqa təmsilçilərinin bir çoxunun maraq dairəsindədi. Onlardan hansısa birində rahat çıxış edə bilər. Görünən odu ki, Qurban Qurbanov da futbolçunu saxlamaqda o qədər də maraqlı deyil.

Burdan belə düşmək olar ki, yayda “Qarabağ”ı hələ ki Filip tərk edəcək. Redaksiyamıza daxil olan məlumata görə, klub Riçard Almeyda ilə müqaviləni yenilənəmək niyyətindədi. Qurban Qurbanov milli karyerasını başa vurduğunu açıqlayan “sambaçı”nın xidmətindən daha 1 il yararlanmaq istəyir.

İcarəyə göndərilmək ehtimalı olanlar

Bildiyiniz kimi, Nihad Quliyevlə Rauf Hüseynli “Şamaxı”da, Rüstəm Əhmədzadə isə “Zirə”də icarə əsasında çıxış edir. Onlar mövsümün sonunda yenidən “köhlən atlar”a qoşulacaq. Bu futbolçulardan biri yenidən icarəyə veriləcək. Söhbət Rauf Hüseynlidən gedir. Nihad Quliyev “Qarabağ”da qalacaq. Rüstəm Əhmədzadənin taleyi isə sual altındadı.

Ramil Şeydayev “Qarabağ”dan ayrılsa, vinger Ağdam təmsilçisində qalacaq. Çünki Qurban Qurbanova cinahda çıxış edəcək sürətli və texnikalı futbolçu lazımdı. Rüstəm bu meyarlara uyğundu. Qurban Qurbanov ona çempionat oyunlarında şans verərək əsas heyət üzvünə çevirə bilər.

Ramilin Ağdam təmsilçisində qalması Rüstəmin yenidən “Zirə”yə və ya başqa komandaya icarəyə verilməsinə səbəb olacaq. “Qarabağ”dan ayrılmaq ehtimalı olan futbolçulardan biri də İsmayıl İbrahimlidi. Gənc yarımmüdafiəçi, demək olar ki, əsas heyətdə özünə yer tapa bilmir. Vaxtilə ən istedadlılardan biri sayılan İsmayıl böyük ehtimalla icarəyə göndəriləcək.

Adı transfer xəbərlərində hallananlar

Bu siyahıda 4 futbolçu yer alıb. Söhbət Elvin Cəfərquliyev, Musa Qurbanlı, Marko Yankoviç və Abdulla Zubirdən gedir. Adı çəkilənləri transfer etmək istəyən klublar çoxdu. Musa ilə Avstriyanın “Zaltsburq”, Elvinlə Belçikanın “Anderlext”, Yankoviçlə Fransanın “Nant”, Zubirlə isə Türkiyənin “Samsunspor” komandası maraqlanır. Yayda bu keçidlərin hansısa birinin baş tutması “Qarabağ”ın öz transfer siyasətinə də təsir edəcək.

4 mövqeyə futbolçu axtarılır

Gedənlərdən asılı olmayaraq, Ağdam təmsilçisi mərkəz hücumçusu, sol cinah vingeri, mərkəz müdafiəçisi və qolkiper axtarışındadı. Düzdü, bu mvqelərdə güclü futbolçuları var. Lakin Qurban Qurbanov mümkün zədələrdən ehtiyatlanır. Təcrübəli mütəxəssis avrokubok matçlarında problem yaşamamaq və heyətin daha da güclənməsi üçün bu mövqelərdə 2-3 eyni səviyyəli futbolçuların olmasını istəyir.

“Qarabağ”ı tərk edənlərin olacağını da nəzərə alsaq, yay “transfer pəncərəsi”ndə Ağdam təmsilçisinin 4-5 səviyyəli legioner transfer edəcəyi dəqiqdi.

Yerli bazara üz tutulmayacaq

“Köhlən atlar” uzun illərdi daxili çempionatda çıxış edən futbolçulara maraq göstərmir. Çünki ehtiyatında kifayət qədər yerli futbolçu var. Lazım olacağı təqdirdə icarəyə göndərilən azərbaycanlı futbolçular qaytarılacaq. Bir sözlə, Ağdam təmsilçisi ənənəyə sadiq qalaraq yenə premyer-liqada çıxış edən komandalardan yerli futbolçu transfer etməyəcək.

İLKİN SULTANLI