Qış "transfer pəncərəsi” çərçivəsində Juninyonu “Flamenqo”ya satan “Qarabağ” qarşıdakı günlərdə daha bir futbolçu ilə yolları ayıra bilər.

“Football-plus.az” xəbər verir ki, söhbət Elvin Cəfərquliyevdən gedir. Bəzi media qurumları və sosial şəbəkələrdə yayılan məlumatlara inansaq, “Ferentsvaroş” cinah müdafiəçisini heyətinə cəlb etmək istəyir.

Hətta tezliklə imzalanması gözlənilən müqavilənin detalları da bəllidi. Belə ki, Macarıstan klubu Elvin üçün “köhlən atlar”a 1 milyon avro təzminat ödəməyə hazırdı. Müştəri ağdamlılara futbolçunun növbəti satışından əldə olunacaq gəlirin 20 faizini də vəd edir.

Xatırladaq ki, transfer reallaşsa, bu, “Ferentsvaroş”la “Qarabağ” arasındakı ikinci sövdələşmə olacaq. Macarlar 2023-cü ilin yanvarında “köhlən atlar”ın heyətindən Ovusu Kvabenanı heyətinə cəlb edib. Onu da əlavə edək ki, “Ferentsvaroş” ötən ilin yayında Kadi Borges uğrunda mübarizədə də “Qarabağ”ı “məğlub edib”. Vaxtilə “Neftçi”nin şərəfini qoruyan Mateus Saldanya da bu kollektivin formasını geyir.

KƏNAN BAHADIR