Misli premyer-liqasının 2022/23 mövsümü başa çatdı. Klublar isə 1 ay öncədən qarşıdakı “futbol ili”nin hazırlığına başlayıb. Əsas diqqət mərkəzində olan oyunçular “Qarabağ”la müqaviləsinin müddəti bitənlərdi. Ramil Şeydayevin Ağdam təmsilçisindən ayrılacağı dəqiqləşib. Premyer-liqanın bombardiri karyerasını Taylandda davam etdirəcək. Milli üzvü “Buriram Yunayted”ə keçəcək.

Ağdam təmsilçisi ilə yolları ayıran futbolçulardan biri də Filip Ozobiçdi. Onunla yeni müqavilə bağlanmayıb. Mediada yarımmüdafiəçinin karyerasını “Zirə”də davam etdirəcəyi yazılıb. Bununla bağlı redaksiyamıza məlumat daxil olub. Bəli, “qartallar” milli üzvü ilə maraqlanır. Lakin onun paytaxt təmsilçisindən maaş tələbi olduqca yüksəkdi. Böyük ehtimalla Ozobiç karyerasını “Zirə”də davam etdirməyəcək.

İyunun 30-da “köhlən atlar”la müqaviləsinin müddəti bitəcək futbolçulardan biri də Rahil Məmmədovdu. Ağdam təmsilçisi hələ ki müdafiəçi ilə bağlı qərar verməyib. “Qarabağ” bu mövqeyə daha güclü futbolçu tapmasa, 27 yaşlı oyunçu ilə yenidən masa arxasına oturacaq.

Premyer-liqanın son çempionun kapitanlarından Qara Qarayevin də müqaviləsinin müddəti iyunun 30-da başa çatır. Mediada yazılanlara inansaq, milli üzvü ilə “Zirə”, “Sabah” və “Neftçi” maraqlanır. Lakin Qaranın əsas məqsədi “köhlən atlar”la yeni müqavilə bağlamaqdı.

Ağdam klubunu tərk etmək ehtimalı olan futbolçulardan biri də İsmayıl İbrahimlidi. O, yayda icarəyə göndəriləcək. Böyük ehtimalla yarımmüdafiəçi növbəti mövsüm “Zirə”nin uğurları üçün tər tökəcək.

İLKİN SULTANLI