Aprelin 10-da keçirilən oyunlarla Konfrans Liqasında (KL) 1/4 finala start verildi. Bu mərhələin ilk matçlarında heç-heçə qeydə alınmaması diqqəti daha çox cəlb etdi. Ev sahiblərindən yalnız birinin qələbə qazanması da böyük ölçüdə əksər favorit komandaların mərhələyə səfərdə başlamasıyla bağlıdı.

1/8 finalda iştirakı hələ vahid liqa mərhələsinin 5-ci turundan sonra rəsmiləşən “Çelsi” maksimum nəticə göstərən yeganə komanda statusunu davam etdirdi. İngiltərə klubu 1/4 finalda “Legiya” ilə rəqabətdə aşkar favorit statusunu ilk oyundaca sübut etdi. Hərçənd londonlular Varşavadakı matçın ilk yarısında üstünlüklərini hesabda əks etdirə bilmədilər. Baş məşqçi Entso Mareskanın fasilədə əl atdığı əvəzləmələr bəhrə verdi. İkinci hissəyə hücumlarla başlayan qonaqlar səviyyə fərqini aşkar şəkildə nümayiş etdirdilər. Əvvəlcə Ceymsin zərbəsindən sonra qapıçının qaytardığı topa özünü çatdıran Corc hesabı açdı. Bundan sonra da meydanda hegemonluq edən “Çelsi” hesabı darmadağı həddinə çatdırdı. Sançonun iki ötürməsini Madueke qola çevirdi. Nkunkunun 73-cü dəqiqədə penaltini boşa verdiyini də qeyd edək. Necə deyərlər, yarımfinalın qapısını açan “Çelsi”nin KL-dəki qələbə seriyasını 9 oyuna çatdırdı. Bu, 4-cü mövsümü keçirilən turnirin yeni rekordudu.

İspaniyada baş tutan “Betis” - “Yagelloniya” oyununun nəticəsi də gözlənilən kimi oldu. Əsas mərhələni yekun cədvəlin 15-ci pilləsində başa vuran “Betis” ilk hissədəcə iki cavabsız qol vurmaqla La Liqa Polşa çempionatı arasındakı fərqi az-çox nümayiş etdirdi.

Əsas mərhələdə topların daha yaxşı fərqinə əsasən 3-cü yeri tutan “Fiorentina”nın da 1/4 finaldakı startı uğurlu alındı. KL-in son iki mövsümünün finalçısı səfərdə “Selye”ni 2:1 hesabıyla məğlub edərək mərhələni adlamaq şansını artırdı. 1955/56 mövsümündən sonra qitə kuboklarında ilk dəfə 1/4 finalda oynayan “Yurqorden” isə İsveçdə “Rapid”ə minimal hesabla uduzaraq yarımfinala çıxmaq şansını azaltdı.

1/4 final, ilk oyunlar
Legiya (Polşa) - Çelsi (İngiltərə) 0:3
Corc, 49. Madueke, 57; 74.
Legiya: Tobiaş, Ruben Vinaqre, Vşolek (Kun, 53), Kapuadi, Pankov, Auqustınyak, Lukinyas (Pekhart, 75), Elitim (Qonsalveş, 75), Oyedele (Şepyanyak, 75), Hodına (Biçaxçyan, 82), Morisita.
Çelsi: Yorgensen, Qüsto (Amuqu, 75), Badyaşil, Adarabioyo (Koluill, 46), Açimponq, Ceyms (Kukurelya, 58), Dyusberi-Holl, Palmer (Madueke, 46), Corc (Meuka, 75), Sanço, Nkunku.

Betis (İspaniya) - Yagelloniya (Polşa) 2:0
Bakambyu, 24. X.Rodriges, 45+2.
Betis: Vieytes, R.Rodriges, Natan, Lyorente (Bartra, 46), Sabali, Kardoso, Fornals (Altimira, 84), X.Rodriges (Ruibal, 57), İsko (Lo Çelso, 46), Antoni (Avilya, 75), Bakambyu.
Yagelloniya: Abramoviç, Braqansa Moutinyo, Eboss, Skşipçak, Stoinoviç (Voytuşek, 61), Flak (Kosta Silva, 82), Romançuk, Çurlinov, Vilyar (Hansen, 61),
İmas (Kubitski, 74), Pululu (Diabi-Fadiqa, 74).

Selye (Sloveniya) - Fiorentina (İtaliya) 1:2
Delorye-Şobe, 68-p. – Ranyeri, 27. Mandraqora, 62-p.
Selye: Rikardo Silva, Karniçnik, Nemaniç, Vuklişeviç, Nyeto, Kvesiç (İosifov, 83), Delorye-Şobe (Edmilson Santos, 89), Svetlin, Zabukovnik, Matko, Seşlar.
Fiorentina: De Xea, Komutso, Ranyeri, Ponqraçiç, Folorunşo (Dodo, 77), Adli (Facoli, 63), Kataldi (Riçardson, 61), Mandraqora, Moreno (Parizi, 46), Zanyolo (Ken, 89), Beltran.

Yurqorden (İsveç) - Rapid (Avstriya) 0:1
Finndell, 62-öz qapısına.
Yurqorden: Rinne, Une Larsson, Kosuqi, Danielsson, Ştol, Haarala (Muluqeta, 78), Finndell, Qulliksen (Berq, 83), Fallenius, Priske, Juqel (Tenho, 89).
Rapid: Hedl, Osvald, Ro-Yao, Svetkoviç, Bolla, Qrqiç (Borkeyt, 77), Romeo (Bişof, 62), Şaub (Raduloviç, 85), Yansson, Belyo (Zaydl, 62), Kara (Burqştaller, 85).

Cavab oyunları aprelin 17-də keçiriləcək.

Bombardirlər: Pululu (Yagelloniya) - 8, Bakambyu (Betis), Qiyu (Çelsi), Kuçis (Selye) - 6.