Fevralın 13-də Konfrans Liqasının (KL) pley-offuna start verildi. Bu mərhələnin ilk 8 oyunu keçirildi.

"Football-plus.az" xəbər verir ki, vahid liqanın yekun cədvəlində ilk 8 yeri tutan “Çelsi”, “Gimaraynş”, “Fiorentina”, “Rapid”, “Yurqorden”, “Luqano”, “Legiya” və “Serkl Brügge” birbaşa 1/8 finala vəsiqə qazanıblar. Reqlamentə əsasən, əsas bu mərhələni 9-24-cü yerlərdə başa vuranlar isə pley-off oyunlarında iştirak edəcəklər. Bu oyunların 8 qalibi 1/8 finala çıxacaq.

Əsas mərhələnin diqqəti daha çox cəlb edən faktı kimi KL-də iştirak edən qitənin 5 aparıcı liqasından olan 4 komandadan ikisinin ilk “8-liy”ə düşə bilməməsini vurğulaya bilərik. Xatırladaq ki, “Çelsi” 6 oyuna maksimum nəticə ilə 1-ci yerə sahib çıxıb. Turnirin son iki mövsümünün finalçısı olan “Fiorentina” yekun cədvəli 3-cü yerdə başa vurarkən, hərəyə 10 xal toplayan “Betis” ilə “Haydenhaym” uyğun olaraq 15-16-cı yerləri tutmuşdular. “Böyük beşliy”in təmsilçiləri, necə deyərlər, əsas mərhələdəki səhvlərini pley-offun ilk oyunundaca düzəltdilər: imkanları yüksək dəyərləndirilən hər iki komanda səfərdə qələbə qazandı.

“Betis” Belçikada “Gent”in qapısına ilk yarıda yol tapa bilməsə də, fasilədən sonra üç cavabsız qolla səviyyə fərqini göstərdi. “Kopenhagen” evdə ilk hissənin sonunda hesabı açdı, amma “Haydenhaym” matçın həlledici hissəsində iki top vuraraq Almaniyaya qələbə ilə qayıtdı. İlk oyunlardan sonra “Yagelloniya”, “Borats”, “Şemrok Rovers” və “Vikinqur” da pley-offu adlamaq imkanını artırdı.

pley-off, ilk oyunlar
Gent (Belçika) – Betis (İspaniya) 0:3
Antoni, 47. Bakambyu, 71. Altimira, 84.
Betis: Vieytes, Perro, Natan, Bartra, Sabali (Ortis, 90), Roka (Altimira, 81), Lo Çelso (Flores, 90), Ezzalzuli, İsko (Kardoso, 74), Antoni (Çimi Avila, 74), Bakambyu.

Kopenhagen (Danimarka) – Haydenhaym (Almaniya) 1:2
Larsson, 45+1 – Keller, 59. Zirsleben, 75.
Haydenhaym: Föller, Toyerkauf (Traore, 46), Zirsleben, Mainka, Buş, Keller, Sienza, Nixyus (Şeppner, 81), Vanner (Bek, 84), Konte (Honzak, 61), Piringer (Zivzivadze, 61).

Borats (Bosniya və Hersoqovina) – Olimpiya (Sloveniya) 1:0
Oqrinets, 90+1.

Omoniya (Cənubi Kipr) – Pafos (Cənubi Kipr) 1:1
Semedu, 51-p. – Orşiç, 84.

TSÇ (Serbiya) – Yagelloniya (Polşa) 1:3
Mbunqu, 28 – İmas, 31; 88. Pyulyulyu, 81.

Selye (Sloveniya) – APOEL (Cənubi Kipr) 2:2
Kuçis, 2; 59 – Abanya, 33. Layfis, 70.

Vikinqur (İslandiya) – Panatinaikos (Yunanıstan) 2:1
Atlason, 12. Vilhyalmsson, 56 – İoannidis, 90+1-p.

Molde (Norveç) – Şemrok Rovers (İrlandiya) 0:1
Nunan, 57.

Cavab oyunları fevralın 20-də keçiriləcək.

Bombardirlər: Qiyu (Çelsi), Pyulyulyu (Yagelloniya) - 6, Kenni (Şemrok Rovers), Nkunku (Çelsi), Pantoviç (TSÇ), Pyontek (İstanbul BŞ) - 5.