Aprelin 2-də Cənubi Amerikanın ən nüfuzlu klub turnirinin 2025-ci il mövsümünün əsas mərhələsinə start verildi.

Libertadores Kubokunun (LK) qrup mərhələsinin ilk turu çərçivəsində 16 oyun keçirildi.

Xatırladaq ki, LK-nın təsnifat mərhələsinin qalibləri “Alyansa Lima” (Peru), “Serro Portenyo” (Paraqvay), “Barselona” (Ekvador) və “Bayya” (Braziliya) olub. Əsas mərhələdə regionun 10 ölkəsindən olan 32 komanda iştirak edir. Maraq üçün qrup turnirində Braziliyanın 7, Argentinanın 6, Ekvador, Peru və Paraqvayın 3, Çili, Uruqvay, Kolumbiya, Boliviya və Venesuelanın isə hərəyə 2 komanda ilə təmsil olunduğunu qeyd edək.

Reqlamentə gəlincə, iddiaçılar hərəsində 4 komanda olmaqla 8 qrupda mübarizə aparacaqlar. İkidövrəli sistemlə keçiriləcək oyunlardan sonra qruplarda ilk iki yeri tutacaq klublar 1/8 finalda oynamaq, qrup 3-cüləri isə mübarizəni Sudamerikana Kubokunda davam etdirmək hüququ qazanacaqlar. Qrup mərhələsinə mayın 30-da yekun vurulacaq.

İlk turda qeydə alınan nəticələr sırasında əvvəlcə turnirin son çempionu olan “Botafoqo”nun yeni mövsümə məğlubiyyətlə başladığını qeyd edək. Rio de janeyrolular Çilidə “Universidad de Çili”yə minimal hesabla uduzdular. Qeyd edək ki, LK-nın son finalçısı “Atletiko Mineyro” bu mövsüm turnirə vəsiqə qazana bilməyib.

Ümumiyyətlə, ilk tur Braziliya klubları üçün ümumilikdə qənaətbəxş keçdi. Bu ölkənin açılış turunda meydana çıxan 7 təmsilçisindən üçü qələbə qazandı, ikisi rəqibi ilə “sülh bağladı”, ikisi isə məğlub oldu. İlk turda Braziliya derbisinin yaşandığını da bildirək: F qrupunda yarışan “Bayya” ilə “İnternasyonal” 1:1 hesablı heç-heçəyə razılaşdılar. C qrupunun favoriti sayılan “Flamenqo”ya Venesuelada “Deportivo Taçira” üzərində qələbə qazandıran yeganə qolun müəllifinin “Qarabağ”ı yanvarda tərk edən Juninyo olduğunu da qeyd edək. 28 yaşlı hücumçu 56-cı dəqiqədə meydana çıxandan bir neçə saniyə sonra qapıya yol tapdı.

İlk turu Argentina klubları üçün uğurlu saymaq olar. Bu ölkənin 6 təmsilçisinin startdakı göstəriciləri belə oldu: 4 qələbə, 1 heç-heçə, 1 məğlubiyyət.

qrup mərhələsi, 1-ci tur
A qrupu
Universidad de Çili (Çili) - Botafoqo RJ (Braziliya) 1:0
Di Yorio, 59.
Karabobo (Venesuela) - Estudiantes (Argentina) 0:2
Nunyes, 45. Askasibar, 73-p.

B qrupu
Barselona (Ekvador) - İndependyente del Valye (Ekvador) 1:0
Karabali, 5.

Universitario (Peru) - River Pleyt (Argentina) 0:1
P.Dias, 17.

C qrupu
Deportivo Taçira (Venesuela) - Flamenqo (Braziliya) 0:1
Juninyo, 57.

Sentral Kordoba (Argentina) - LDU Kito (Ekvador) 0:0

D qrupu
Alyansa Lima (Peru) - Libertad (Paraqvay) 0:1
Agilar, 52.

Talyeres de Kordoba (Argentina) - San Paulu (Braziliya) 0:1
Alisson, 76.

E qrupu
Fortaleza (Braziliya) - Rasinq (Argentina) 0:3
Salas, 26. Almendra, 48. S.Sosa, 84.

Atletiko Bukaramanqa (Kolumbiya) - Kolo Kolo (Çili) 3:3
Londonyo, 9. Pons, 24. Enao, 57 – M.Korrea, 38-p.; 84. İsla, 63.

F qrupu
Atletiko Nasyonal (Kolumbiya) - Nasyonal (Uruqvay) 3:0
İnestrosa, 45+2. Viveros, 55. Morelos, 72.

Bayya (Braziliya) - İnternasyonal (Braziliya) 1:1
Jean Lukas, 73 – Valensiya, 84.

G qrupu
Sportinq Kristal (Peru) - Palmeyras (Braziliya) 2:3
Pretell, 67. Tavara, 83 – Estevao, 38. Pikeres, 82-p. Rios, 90+2.

Serro Portenyo (Paraqvay) - Bolivar (Boliviya) 4:2
X.Torres, 45+3; 47; 65. Morel, 72 – Vaka, 17; 89.

H qrupu
Veles Sarsfild (Argentina) - Penyarol (Uruqvay) 2:1
Karriso, 80. Montoro, 90+5 – L.Fernnades, 48.

San Antonio de Bulo Bulo (Boliviya) - Olimpiya (Paraqvay) 3:2
S.Viveros, 30. L.Barbosa, 71. X.Errera, 90+11-p. – U.A.Benites, 64. Ortis, 79.

Bombardirlər: X.Torres (Serro Portenyo) - 3, M.Korrea (Kolo Kolo), Vaka (Bolivar) - 2.