Aprelin 2-də Cənubi Amerikanın ən nüfuzlu klub turnirinin 2024-cü il mövsümünün əsas mərhələsinə start verildi.

“Football-plus.az” xəbər verir ki, Libertadores Kubokunun (LK) qrup mərhələsinin ilk turu çərçivəsində 16 oyun keçirildi.

Xatırladaq ki, LK-nın təsnifat mərhələsinin qalibləri “Palestino”, “Botafoqo” (Rio de Janeyro), “Kolo Kolo” və “Nasyonal” olub. Başqa sözlə, seçmə oyunlardan qrup turnirinə Çilinin 2, Braziliya və Uruqvayın hərəyə bir komandası vəsiqə qazanıb. Əsas mərhələdə regionun 10 ölkəsindən olan 32 komanda iştirak edir. Maraq üçün qrup turnirində Braziliyanın 7, Argentinanın 5, Çilinin 4, Ekvador və Uruqvayın 3, Paraqvay, Kolumbiya, Peru, Boliviya və Venesuelanın isə hərəyə 2 komanda ilə təmsil olunduğunu qeyd edək. Reqlamentə gəlincə, iddiaçılar hərəsində 4 komanda olmaqla 8 qrupda mübarizə aparacaqlar. İkidövrəli sistemlə keçiriləcək oyunlardan sonra qruplarda ilk iki yeri tutacaq klublar 1/8 finalda oynamaq, qrup 3-cüləri isə mübarizəni Sudamerikana Kubokunda davam etdirmək hüququ qazanacaqlar. Qrup mərhələsinə mayın 30-da yekun vurulacaq.

İlk turda qeydə alınan nəticələr sırasında əvvəlcə turnirin son çempionu olan “Fluminense”nin yeni mövsümə heç-heçə ilə başladığını qeyd edək. Bu uğuru Fernando Dinizin başçılığı altında qazanan rio de janeyrolular Peruda “Alyansa Lima” ilə 1:1 hesabına razılaşdılar. Qeyd edək ki, LK-nın son finalçısı “Boka Xuniors” bu mövsüm turnirə vəsiqə qazana bilməyib. Ümumiyyətlə, ilk tur Braziliya klubları üçün ümumilikdə uğursuz keçdi. Bu ölkənin açılış turunda meydana çıxan 7 təmsilçisindən yalnız biri qələbə qazandı, 3-ü rəqibi ilə “sülh bağladı”, 3-ü isə məğlub oldu. Braziliya klub futbolunun təsəlli qələbəsini “Karakas”ı Venesuelada 4:1 hesabıyla məğlub edən “Atletiko Mineyro” qazandı. İlk turu Argentina klubları üçün uğurlu saymaq olar. Bu ölkənin 5 təmsilçisinin startdakı göstəriciləri belə oldu: 3 qələbə, 2 heç-heçə.

qrup mərhələsi, 1-ci tur
A qrupu
Alyansa Lima (Peru) - Fluminense (Braziliya) 1:1
Serna, 35 – Markinyos, 72.
Kolo Kolo (Çili) - Serro Portenyo (Paraqvay) 1:0
Sepeda, 90+4.

B qrupu
Kobresal (Çili) – Barselona (Ekvador) 1:1
L.Valensiya, 90+1-p. – Fidrişevski, 52-p.

Talyeres de Kordoba (Argentina) - San Paulu (Braziliya) 2:1
Ruis Rodriges, 45+6. Botta, 53 – Lusiano, 66.

C qrupu
Stronqest (Boliviya) - Qremio (Braziliya) 2:0
Ursino, 16. Triverio, 73.
Uaçipato (Çili) - Estudiantes (Argentina) 1:1
K.Martines, 81 – X.Korrea, 42.

D qrupu
Universitario (Peru) - LDU Kito (Ekvador) 2:1
Rivera, 50; 70 – Kinyones, 29.
Botafoqo RJ (Braziliya) - Xunior (Kolumbiya) 1:3
Uqo, 43 – Bakka, 13-p.; 41. Fuentes, 28.

E qrupu
Milyonarios (Kolumbiya) - Flamenqo (Braziliya) 1:1
D.Ruis, 80 – Pedro, 64-p.
Palestino (Çili) - Bolivar (Boliviya) 0:4
Fransisko da Kosta, 27-p.; 34. Bruno Savio, 63. Vaka, 83.

F qrupu
San Lorenso (Argentina) - Palmeyras (Braziliya) 1:1
Romanya, 20 – Pikeres, 81.
Liverpul (Uruqvay) - İndependyente del Valye (Ekvador) 1:1
L.Rodriges, 79 – Ortis, 8.

G qrupu
Karakas (Venesuela) - Atletiko Mineyro (Braziliya) 1:4
D.Peres, 54 – Bruno Fuxs, 12. Gilyermo Arana, 32. Paulinyo, 44; 70.
Rosario Sentral (Argentina) - Penyarol (Uruqvay) 1:0
Kintana, 45+1.

H qrupu
Deportivo Taçira (Venesuela) - River Pleyt (Argentina) 0:2
Boselli, 72. Fonseka, 79.
Nasyonal (Uruqvay) - Libertad (Paraqvay) 2:0
Losano, 32. Bentankurt, 62.
Bombardirlər: Bakka (Xunior), Fransisko da Kosta (Bolivar), Paulinyo (Atletiko Mineyro), Rivera (Universitario) – 2.