Ötən həftə Cənubi Amerikanın ən nüfuzlu klub turnirinin 2023-cü il mövsümünün əsas mərhələsinə start verildi. Libertadores Kubokunun (LK) qrup mərhələsinin ilk turu çərçivəsində 16 oyun keçirildi.

Xatırladaq ki, LK-nın təsnifat mərhələsinin qalibləri “İndependyente Medelyin”, “Atletiko Mineyro”, “Serro Portenyo” və “Sportinq Kristal” olmuşdu.

Başqa sözlə, seçmə oyunlardan qrup turnirinə Kolumbiya, Braziliya, Paraqvay və Perunun hərəyə bir komandası vəsiqə qazanmışdı. Əsas mərhələdə regionun 10 ölkəsindən olan 32 komanda iştirak edir. Maraq üçün qrup turnirində Braziliyanın 7, Argentinanın 5, Paraqvay, Kolumbiya, Ekvador və Perunun 3, Boliviyanın, Çili, Uruqvay və Venesuelanın isə hərəyə 2 komanda ilə təmsil olunduğunu qeyd edək. Reqlamentə gəlincə, iddiaçılar hərəsində 4 komanda olmaqla 8 qrupda mübarizə aparacaqlar. İkidövrəli sistemlə keçiriləcək oyunlardan sonra qruplarda ilk iki yeri tutacaq klublar 1/8 finalda oynamaq, qrup 3-cüləri isə mübarizəni Sudamerikana Kubokunda davam etdirmək hüququ qazanacaqlar. Qrup mərhələsinə iyunun 29-da yekun vurulacaq.

İlk turda qeydə alınan nəticələr sırasında əvvəlcə turnirin son çempionu olan “Flamenqo”nun yeni mövsümə məğlubiyyətlə başladığını qeyd edək. Bu uğuru Dorival Juniorun başçılığı altında qazanan rio de janeyroluları indi Vitor Pereyra çalışdırır. Onun komandası Ekvadorda “Aukas”a 1:2 hesabı ilə uduzdu. LK-nın son finalçısı “Atletiko Paranaense”nin yeni mövsümə heç-heçə ilə başladığını da qeyd edək. Bu mövsümdən Paulu Turranın çalışdırdığı komanda Peruda “Alyansa Lima” ilə qolsuz “sülh”ə razılaşdı.

Ümumiyyətlə, ilk turu Braziliya klubları üçün uğurlu saymaq olmaz. Bu ölkənin açılış turunda meydana çıxan 7 təmsilçisindən 2-si qələbə qazandı, 2-si rəqibi ilə “sülh bağladı”, 3-ü isə məğlub oldu. İlk turu Argentina klubları üçün bir qədər qənaətbəxş saymaq olar. Bu ölkənin 5 təmsilçisinin startdakı göstəriciləri belə oldu: 2 qələbə, 2 məğlubiyyət, 1 heç-heçə.

Qrup mərhələsi, 1-ci tur

A qrupu
Aukas (Ekvador) - Flamenqo (Braziliya) 2:1
Kastilyo, 58. Ordonyes, 85 – Mateus França, 39.
Nyublense (Çili) - Rasinq (Argentina) 0:2
M.Roxas, 16. Gerrero, 54.

B qrupu
İndependyente Medelyin (Kolumbiya) - İnternasyonal (Braziliya) 1:1
V.Moreno, 52 – Alan Patrik, 86.
Metropolitano (Venesuela) - Nasyonal (Uruqvay) 1:2
Ç.Ortis, 52 – Qilyotti, 23. Qinella, 90+1.

C qrupu
Bolivar (Boliviya) - Palmeyras (Braziliya) 3:1
Pablo Ervias, 20. Bexarano, 45+1. Useda, 89 – X.Lopes, 13.
Serro Portenyo (Paraqvay) - Barselona (Ekvador) 2:1
Akino, 28-p. Çurin, 73 – K.Ortis, 70.

D qrupu
Stronqest (Boliviya) - River Pleyt (Argentina) 3:1
Triverio, 25-p.; 35. Kastilyo, 48 – Beltran, 66-p.
Sportinq Kristal (Peru) - Fluminense (Braziliya) 1:3
Qrimaldo, 18 – Kano, 35; 59. Vitor Mendes, 81.

E qrupu
Liverpul (Uruqvay) - Korintians (Braziliya) 0:3
Balbuena, 45+1. Rocer Gedeş, 49; 63.
Arxentinos Xuniors (Argentina) - İndependyente del Valye (Ekvador) 1:0
Kabrera, 46.

F qrupu
Monaqas (Venesuela) - Boka Xuniors (Argentina) 0:0
Deportivo Pereyra (Kolumbiya) - Kolo Kolo (Çili) 1:1
Anxelo Rodriges, 81 – Xil, 24-p.

G qrupu
Alyansa Lima (Peru) - Atletiko Paranaense (Braziliya) 0:0
Atletiko Mineyro (Braziliya) - Libertad (Paraqvay) 0:1
D.Qomes, 9.

H qrupu
Patronato (Argentina) - Atletiko Nasyonal (Kolumbiya) 1:2
Levato, 2 – Pabon, 77-p.; 79.
Melqar (Peru) - Olimpiya (Paraqvay) 1:1
Kuesta, 20 – Payva, 14.

Bombardirlər: Kano (Fluminense), Rocer Gedeş (Korintians), Pabon (Atletiko Nasyonal), Triverio (Stronqest) – 2.