“Heç kimə sirr deyil ki, 0:3-dən sonra geri dönmək asan olmur. Amma futbolda mümkünsüz heç nə yoxdu. Xüsusilə də söhbət “Real”dan gedirsə, hər şey gözləmək olar. “Real”ın hücum potensialı böyükdü. Sadəcə, sabitlik çatışmır. Bəzən son oyunda olduğu kimi qol vura bilmirlər. Amma bir də görürsən, növbəti oyunda qısa müddətdə komanda ardıcıl qollar vurur. İntriqanın öldüyünü düşünmürəm. Cavab oyunu çox maraqlı keçəcək. Madridlilər mərhələni keçə bilməsələr, böyük ehtimalla Karlo Ançelottinin dönəmi başa çatacaq. Belə böyük klublarda uğursuz nəticələr həmişə problemlərə, narazılıqlara və sonda da dəyişikliklərə səbəb olur. Həm də Ançelottinin Braziliya yuığmasının başına keçmək ehtimalının olması da məsələni qəlizləşdirir. “Real” fanatları onun artıq əvvəlki qədər motivasiyalı olmadığını düşünməyə başlaya bilər. Bəlkə də reallıqda belə deyil. Amma nəticələr pisləşən kimi istər-istəməz belə fikirlər formalaşır. Vinisius? O az qala “Qızıl top”u qazanmaq üzrə idi. Bundan başqa, FİFA-nın versiyası üzrə qalib oldu. Yəni ilin futbolçusu seçildi. Sonra onun da Səudiyyə Ərəbistanına mümkün keçidi barədə şayiələr yayıldı. Vininin oyununda eniş yaşandıqda tənqid olunması normaldı. “Arsenal” ilə cavab oyunu onun üçün əsl fürsətdi. Vinisius hələ “ölmədiyini”, əvvəlki futbolçu olduğunu və həlledici məqamda səhnəyə çıxmağı bacardığını göstərməlidi. Hər şey onun özündən asılıdı. “Barselona” – “Borussiya” duelində cavab matçına intriqanın qaldığını düşünmürəm. Dortmund klubuna böyük hörmətim olsa da, onların cavab oyununda 0:4-dən geri dönəcəklərinə inanmıram. İndiki “Barselona”nı bir çoxları Qvardiolanın komandası ilə müqayisə edir. Bu “Barsa” bəlkə də həmin səviyyəyə tam çatmayıb. Amma çatmağa çox yaxındı. Hər şey mövsümün sonluğundan asılı olacaq. “Barselona” hər üç turnirdə qalib gəlməyə və “trebl” etməyə qadirdi. Bu baş versə, hamı onlardan danışacaq. Kənardan görünür ki, komandada çox yaxşı ab-hava var. Futbolçular oyundan zövq alır. Paltardəyişmə otağında heç bir problem gözə dəymir. Flik komandanı toparlamağı bacarıb. Kim layiqdisə, onu da meydana buraxır. Bütün bunlar nəticədə də əksini tapır. “Barselona”nın “trebl” etməsi futbolda yeni bir dönəmin əsasını qoya bilərmi? Niyə də yox?! Hadisələrin belə axarı həm İspaniya, həm də Avropa futboluna pozitiv təsir göstərə bilər. Amma dediyim kimi: gəlin, tələsməyək və mövsümün sonunu gözləyək. Bir məqam dəqiqdi ki, “Barselona”nın məşqçi dəyişikliyindən sonra sərgilədiyi futbol ən xoş sözlərə layiqdi. Çünki cəmi 2-3 il öncə klubda çox çətin və gərgin ab-hava hökm sürürdü. Klubda düzgün gedən şeylərin sayı yanlış məqamlardan daha az idi. Ciddi dəyişikliklərə ehtiyac duyulurdu və rəhbərlik də məhz bunu etdi. Həm meydanda, həm də ondan kənarda böyük dəyişikliklər izlədik”.