“Hörmətli izləyicilər, bu günə planlaşdırılan Avropa Liqasının 1/4 final mərhələsinin ilk oyunları çərçivəsində keçiriləcək görüşlərin canlı yayınlanması texniki səbəblərdən mümkün olmayacaq. "CBC Sport"dan asılı olmayan səbəblər, texniki məsələlər ilə bağlı ortaya çıxan problemin həlli üçün lazımi iş gedib. Lakin görülən bütün işlərə baxmayaraq, texniki problemləri həll etmək mümkün olmayıb. Bildiyiniz kimi, fəaliyyət göstərdiyimiz bu 9 il ərzində canlı yayınlamağı planlaşdırdığımız idman yarışlarının verilməsində ciddi problem olmayıb. Avrokubok görüşləri zamanı, ümumiyyətlə belə bir hadisə yaşanmayıb. Televiziyalarda texniki məsələlər səbəbindən bu cür halların - müəyyən yayınların baş tutmaması halları dünya praktikasında da zaman-zaman yaşanır. Bizdən asılı olmayan səbəblərə görə oyunların canlı yayını baş tutmadığı üçün sizdən üzr istəyirik”.

“Texniki problemdi, bizdən asılı olmayan səbəblər idi. “Bude/Qlimt” – “Latsio”, “Lion” – “Mançester Yunayted” oyunlarının yayınlanması nəzərdə tutulurdu. Onuncu ildi fəaliyyətdəyik, çox təəssüf ki, ilk dəfə belə şeylə üzləşdik. Bizə o siqnalı ötürən tərəfdaş şirkətimizin serverində problemi olub. Onlarla bu günə qədər belə problemimiz olmamışdı. İlk oyunun başlamasına 4 saat qalmış bizə xəbər verdilər. Vaxt az olsa da, çalışdıq ki, digər variantlardan istifadə edək. Dörd saat ərzində kənar şirkətlərin tapılması, yazışmalar, müqavilə imzalamaq kimi prosesləri sığışdırmağa çalışdıq, əlimizdən gələn hər şeyi etdik, çatdırmadıq. Rəsmi bəyanat yaymışıq, tamaşaçılardan artıq dərəcədə üzr istəyirik. İlk gündən çalşırıq ki, bizdə problem yaranmasın. Çox istərdik ki, bu problemi anlayışla qəbul etsinlər. İnanıram ki, bu problem “CBC Sport” tarixində ilk və sonuncu dəfə olacaq”.