“CBC Sport” A seriyasını, “İdman TV” premyer-liqanı göstərəcək
Artıq dünən “böyük beşlik” ölkələrindən üçündə - İngiltərə, İspaniya və Fransada yeni mövsüm start götürdü.
Bu ölkələrin çempionatları qitənin hər yerində olduğu kimi, Azərbaycanda da diqqət mərkəzindədi. Keyfiyyətli oyuna baxmağa kim istəməz ki?! Bəs istəyimizlə reallıq üst-üstə düşürmü? Daha doğrusu, bu sualı belə qoyaq: “böyük beşlik” çempionatlarını hansı yerli telekanallarda izləyə biləcəyik?
“İdman TV” srağagün İngiltərə premyer-liqasının matçlarını azarkeşlərə canlı təqdim edəcəyi ilə bağlı anons yaydı. Hətta daha əvvəl yayılan bəzi xəbərlərə görə, “Real TV”də premyer-liqa oyunlarını ölkəmizdə təqdim etmək niyyətindəymiş. Bəs, görəsən, ölkənin digər idman telekanalı olan “CBC Sport” yeni mövsümdə bizlərə futbol həyəcanı yaşadacaqmı? Bu suala cavab tapmaq üçün “CBC Sport” və “Real TV”nin idman departamenti ilə əlaqə saxladıq.
Rüstəm Əfsərli (CBC Sport ):
“Biz İtaliya A seriyasınının oyunlarını yayınlayacağıq. Artıq bu yöndə danışıqlar da yekunlaşıb. İspaniya La Liqası iə bağlı müzakirələr gedir. Birinci turun oyunları verilməyəcək. Hələ ki bu çempionatı göstərməyimiz gündəmdə deyil. Telekanal yaranandan A seriyasını azarkeşlərə təqdim edirik. La Liqa isə 4 mövsüm idi bizdəydi. Premyer-liqanın yayın hüquqlarına müdaxilə etmirik. Çünki bu turnir Azərbaycan çempionatının oyunları ilə üst-üst düşdüyündən oyunlarını göstərməyimiz alınmır”.
İlqar Mikayoğlu (Real TV):
“Mənim özümə də maraqlıdı ki, İngiltərə premyer-liqasının oyunlarının “Real TV”də yayınlanması xəbərini kim çıxarıb? Belə söhbət yoxdu. Amma “Tv.net”də bugündən La Liqanın oyunları veriləcək. Biz bu telekanlla birlikdə İspaniya çempionatının matçlarını yayınlayacağıq. Bir də La Liqanın ən maraqlı oyunları bizim efirdə veriləcək”.
İlqar bəy istisna hallarda avrokubokların ən maraqlı oyunlarının “Real TV”də yayınlana biləcəyini dedi:
“Tutaq ki “Beşiktaş”la hansısa komanda avrokuboklarda oynayır. Bax, biz bu halda da oyunu telekanalımız vasitəsi ilə yayınlaya bilərik”.
CAVİD ƏLİYEV
