''Mançester Yunayted''də ikinci mövsümünü keçirən Altay Bayındır hələ də premyer-liqada debüt etməyib.

''Football-plus.az'' xəbər verir ki, türkiyəli qapıçının əlinə İngiltərə çempionatında debüt etmək üçün ilk dəfə yaxşı fürsət düşüb. Bilindiyi kimi ''Mançester Yunayted'' Avropa Liqasının 1/4 finalında səfərdə ''Lion'' ilə qarşılaşmadan 2:2-lik bərabərliklə ayrıldı. Həmin matça ''Yunayted''in əsas qapıçısı Andre Onananın inamsız oyunu damğa vurdu.

Təcrübəli əlcək sahibinin buraxılan hər iki qolda səhvə yol verməsi ''qırmızı şeytanlar''da qapıçı mövzusunu yenidən aktuallaşdırdı. Oyundan sonra fanatların sosial şəbəkələrdə etiraz etdiyi əsas futbolçu təbii ki, Onana oldu. Şərhlərdə adı ən çox hallanan isimlərdən biri Altay Bayındır oldu. Belə ki, kamerunlu qapıçıdan narazı qalanların böyük əksəriyyəti artıq ''Yunayted''in türkiyəli əlcək sahibinə güvənməli olduğunu iddia edib.

Şərhlərdə ''Amorim növbəti oyunda Bayındıra güvənməsə, ilk dəfə onun axmaq olduğunu dilimə gətirmiş olacam'' və ya ''bazar günü qapıda mütləq Bayındır dayanmalıdı. Mövsümün sonuna az qalıb və 13-cü pillədəyik. Onsuz da Bayındır lap istəsə belə Onanadan zəif oynaya bilməz, çünki bu, mümkün deyil'' kimi ifadələrə də rast gəlmək olar. Bayındırın fanatlar arasında sevilməsinin daha bir səbəbi onun iştirak etdiyi son oyunlardan birində əsil qəhrəmana çevrilməsidi. Yanvarın ortalarında İngiltərə kubokunda 26 yaşlı qapıçı ''Arsenal'' ilə səfər oyununda inanılmaz performans sərgiləmişdi. O, həm matçın gedişində, həm də oyunsonrası penaltilər seriyasında penalti dəf etməklə komandasını növbəti mərhələyə daşımışdı.

Bu arada İngiltərə mətbuatında ilk dəfə baş məşqçi Ruben Amorimin premyer-liqada Altaya şans verə biləcəyi barədə xəbərlər peyda olub. Manikunianları bazar günü 32-ci tur çərçivəsində çətin ''Nyukasl'' səfəri gözləyir. Türkiyəlinin bu oyunda iştirak etmək şansı heç vaxt olmadığı qədər yüksəkdi. Bu baş verəcəyi təqdirdə Altay həm də premyer-liqada forma geymiş ilk türkiyəli qapıçı kimi tarixə düşəcək!

Bayındırın bu mövsüm cəmi 6 rəsmi oyunda forma geydiyini və bunların 2-də qapısını toxunulmaz saxladığını bildirək.