Millətlər Liqasının C liqasının 4-cü qrupunda Monteneqroya qarşı keçirilən oyunda “sülh”ə razılaşan qadın futbolçulardan ibarət yığma şəriksiz lider olmaq şansını əldən verdi. Səfərdən bir xalla qayıdan komanda indiyə qədər dünən qarşılaşdığı rəqibiylə eyni sayda - 5 xal toplayıb.

Bəs, Siyasət Əsgərovun komandasının yarışı qrup lideri kimi başa vurmaq şansı nə dərəcədə böyükdü? “Football-plus.az” bu suala cavab tapmağa çalışdı.

Əvvəlcə turnir cədvəlinə nəzər salaq.

1. Monteneqro 3 2 1 0 4-2 5
2. Azərbaycan 3 2 1 0 3-1 5
3. Litva 2 0 0 2 1-5 0

Göründüyü kimi, Monteneqroyla millimizin bütün göstəriciləri eynidi. Həmçinin bu komandaların bir-biriylə qarşılaşdığı hər iki matçda qalib müəyyənləşməyib – 0:0, 1:1. Deməli, liderlik yarışına son iki matçdan sonra aydınlıq gələcək. Söhbət aşağıdakı oyunlardan gedir:
30 may. Azərbaycan – Litva
3 iyun. Litva – Monteneqro

Burda millimiz üçün sərf edən və etməyən məqamlar var. Yığmamızın “doğma divarlar” arasında meydana çıxması, Litvanın bir qədər yol yorğunu olması bizim üçün müsbət məqamdısa, qonaqların ilk oyununu millimizə qarşı keçirməsi Monteneqro üçün sərfəlidi. Çünki bu komanda dörd gün əvvəl oyun keçirən və Azərbaycan səfərindən qayıtdığı üçün xeyli yorğun olacaq rəqibə qarşı oynayacaq. Həmçinin artıq Azərbaycan – Litva matçının nə ilə bitdiyi bəlli olacağından hansı nəticənin məqsədəuyğun olduğunu biləcək.

Düzdü, Litvanın çox böyük şücaət göstərərək, hər iki rəqibi məğlub etməsi ehtimalı da var. Lakin yarış ərzində xeyli zəif görünən Baltikyanı ölkə təmsilçisinin belə möcüzəyə imza atmaq iqtidarında olmadığı bəllidi. Bununla belə, millimiz Litvayla oyunda mütləq qələbə qazanmaqla yanaşı, bacardığı qədər qol vurmalıdı. Mümkün qələbə nə qədər böyükhesablı olsa, o qədər arxayın olacağıq.

Hər halda, şansımız var. Bizə lazım olan millinin böyükhesablı qələbəsidi. Ardından hamı bir nəfər kimi Litvaya azarkeşlik etməliyik.

KƏNAN BAHADIR