KONKAKAF Çempionlar Kubokunda 1/4 finalın cavab oyunları keçirilib.

''Football-plus.az'' xəbər verir ki, Lionel Messinin şərəfini qoruduğu ''İnter Mayami'' ''Los Anceles''i qəbul edib. Ötən həftə baş tutan ilk oyunda ''Los Anceles'' evdə 1:0 hesabı ilə üstün olmuşdu. Türkiyəli vinger Cengiz Ündər, eləcə də tanınmış fransalı qapıçı Uqo Lyorisin şərəfini qoruduğu bu klub üçün cavab oyunu da uğurlu başladı. Qonaqlar artıq 9-cu dəqiqədə hesabı açaraq ümumilikdə iki topluq üstünlük yaxaladılar.

Bu turnirdə hələ də səfər qolu prinsipi qüvvədədi. Yəni qalan müddətdə ''İnter Mayami'' mərhələ adlamaq üçün mütləq ən azı 3 qol vurmalı idi. Təbii ki, belə çətin və məsuliyyətli anda səhnəyə Messidən başqa futbolçu çıxa bilməzdi. Argentinalı superulduz əvvəlcə 35-ci dəqiqədə mükəmməl zərbə ilə Uqo Lyorisi məyus etdi. Bir saatın tamamında Messi bu dəfə aktivinə məhsuldar ötürmə yazdı və Noa Allen komandasını hesabda önə keçirdi. Messi həlledici qolu isə 84-cü dəqiqədə penaltidən vurdu (3:1). Beləliklə, ''İnter Mayami'' tarixində ilk dəfə KONKAKAF Çempionlar Kubokunun yarımfinalına yüksəldi.

Yarımfinalda ''İnter Mayami'' Kanada təmsilçisi ''Vankuver'' ilə qarşılaşacaq. Digər cütdə Meksikanın iki təmsilçisi - ''Tiqres'' ilə ''Kruz Azul'' üz-üzə gələcək. ''Qızıl top''un səkkizqat qalibi çox uğurlu mövsüm keçirməkdə davam edir. Messi bu mövsüm 9-cu rəsmi oyununu keçirdi.

O, bu qarşılaşmalarda 8 qol, 3 məhsuldar ötürməlik performans ilə 11 qolun vurulmasında yaxından iştirak edib.