“Hakimlər Komitəsi adına xələl gəlməsini istəməz” – cavab oyunlarına əcnəbilər gəlsinmi?
Ölkə kubokunun yarımfinal mərhələsinin ilk oyunlarındakı mübahisəli epizodlardan xəbərdarsız.
Xatırladaq ki, “Araz-Naxçıvan” – “Qarabağ” oyunundan sonra Qurban Qurbanov, “Neftçi” – “Sabah” oyunundan sonra Vasili Berezutski idarəçilikdən kəskin narazılıq etdi. Hazırda gündəmdə olan məsələlərdən biri də yarımfinalın cavab oyunlarına əcnəbi hakimlərin təyin edilməsidi. Düzü, “Qarabağ” – “Zirə” oyunundan sonra keçirilən mətbuat konfrasında Qurban Qurbanov bu ideyanı “isti” qarşılamadı.
Biz isə əcnəbi hakimin dəvət olunması ideyasına Fariz Yusifovun münasibətini öyrəndik:
“Əcnəbi hakim praktikası bizim dönəmdə də oldu. Bəzi klublar təkidlə əcnəbilərin gəlməsini istəyirdi. Çempionatda və bir dəfə də kubokda yarımfinal oyununa tələb olundu. AFFA və PFL rəhbərliyi yerli hakimlərin üzərində dayandı. Heç bir problem olmadı. Obyektiv və şəffaf idarəçilik oldu. İndiki dönəmdə klubların əcnəbi hakim ideyasını gündəmə gətirəcəyinə inanmıram. Cavab oyunları heç bir problem yaratmaz. Hakimlərimizin təcrübəsi var. “Neftçi” – “Sabah” matçında hakimlər briqadası diqqətsizlik göstərdi. Cavab oyunlarının öhdəsindən gələ biləcək hakimlərimiz var. Əcnəbi hakimlərə ehtiyac yoxdu. Hakimlər Komitəsi adına xələl gəlməsini istəməz. Rəhbərliyin öz hakimlərimizin üzərində dayanmasını istəyərəm. Hakimlərimizə psixoloji cəhətdən dəstək lazımdı. Cavan hakim yetişdirmək əvəzinə əcnəbi hakim gətirib, “işimizin öhdəsindən gəldik” demək iş deyil. Öz hakimlərimizə inanıram”.
ƏSƏD SEYİDOV
Digər xəbərlər
