“Bu qədər sönük keçən oyun bu qədər müzakirəyə səbəb olmalı deyildi. Qoldan sonra hər futbolçu bir formada sevincini bölüşür. Felipe Santosun da şüuru bura qədər çatır ki, gedib künc bayrağına təpik atsın. Dünya futbolunda da belə hadisələr olur. Hakimlər futbolçuların hərəkətlərinə nəzarət etməlidi. Oyun qaydalarında hakimlərin futbolçuların davranışı fonunda sarı və qırmızı vərəqələri hansı hallarda göstərməli olduğu açıq-aydın yazılıb. Əminəm ki, nəinki bizim hakimlər, dünya futbolunda da oyun idarə edən referilər bu qaydaları mükəmməl bilir və oyunlara təyinat alır. Felipe Santosun hərəkəti çılğınlığından irəli gələ bilər, amma qol vurub elə etmək düzgün deyil. Mütləq qaydada futbolçular davranışına fikir verməlidi. Son vaxtlar hakimlər çox xırda şeyləri gözdən qaçırırlar. Məsələn, Qurban Qurbanovun texniki zonada elə hərəkət etməsi. Ola bilər ki, baş hakim görmədi. Bəs dördüncü hakim hara baxır? Santosun o hərəkətində xoşbəxtlikdən künc bayrağı qırılmadı. Qırılsaydı, əlavə künc bayrağı olmasaydı, nə olacaqdı? Adi bir şeyə görə oyun yarımçıq qalacaqdı. Bu, futbolçuya yaraşmayan hərəkət idi. Şablon çərçivəsində sarı vərəqə verilməli idi. Sarı olmasa da, baş hakim şifahi xəbərdarlıq etməliydi ki, futbolçu hərəkətlərinə nəzarət etsin”.