Təxminən 4 aylıq fasilədən sonra Braziliya çempionatının yeni mövsümünə start verildi. Martın son, aprelin ilk günlərində A seriyasında 1-ci turun oyunları keçirildi.

"Football-plus.az" xəbər verir ki, Brazileyrao-2025-in dekabrın 20-də başa vurulması nəzərdə tutulub. Turnirin reqlamentini də xatırladaq. A seriyasında əvvəlki kimi 20 komanda müxtəlif hədəflər uğrunda ikidövrəli sistemlə mübarizə aparacaq. Yekun turnir cədvəlində ilk 4 yeri tutacaq komandalar birbaşa Libertadores Kubokunun (LK) qrup mərhələsinə, 5-6-cı yerlərdə qərarlaşacaq iştirakçılar bu turnirin təsnifat mərhələsinə vəsiqə qazanacaqlar. Mövsümü 7-12-ci yerlərdə başa vuracaq komandalar Sudamerikana Kubokunda çıxış etmək hüququna yiyələnəcəklər. Son 4 pilləni tutacaq komandalar isə B seriyasına düşəcəklər.

Onu da xatırladaq ki, 2024-cü il mövsümündə “Botafoqo” (Rio de Janeyro) çempion olub, “Palmeyras” 2-ci, “Flamenqo” isə 3-cü yeri tutub. Son mövsümü uyğun olaraq 17-20-ci yerlərdə başa vuran “Atletiko Paranaense”, “Krisiuma”, “Atletiko Qoyaniense” və “Kuyaba” A seriyasını tərk edib. Bu komandaları yeni mövsümdə “Santos”, “Mirassol”, “Sport Resife” və “Seara” əvəzləyəcək. “Santos”un yüksək liqaya birillik fasilədən sonra qayıtdığını da bildirək.

Birinci turda qeydə alınan nəticələrə gəlincə, mövsüm, necə deyərlər, böyük afişa ilə başladı. Bundan maraqlı start ola bilməzdi: son çempion “Botafoqo” vitse-çempion “Palmeyras”ın qonağı oldu! Ötən mövsüm rio de janeyrolulardan 6 xal geri qalan san paululuları yenə Abel Ferreyra çalışdırır. “Botafoqo”nu Libertadores Kubokunda da qələbəyə daşıyan Artur Jorje isə indi “Əl-Rayyan”a (Qətər) başçılıq edir. 53 yaşlı portuqaliyalının yerini həmyerlisi Renato Payva tutub. “Palmeyras”ın ilk turun mərkəzi oyununa zədə amilinə görə çox sayda itkilərlərlə çıxması çempionun işinə yaramaya bilməzdi. Ev sahibləri topla daha çox oynasalar da, qapıya dəqiq zərbələr planında rəqibdən 3:5 hesabıyla geri qaldılar. Qapıçılar 8 dəqiq zərbənin hamısını dəf etdilər və San Pauludakı matç başladığı hesabla sona çatdı.

Son mövsümün bürünc mükafatçısı “Flamenqo” da ilk turda bir xal qazana bildi. Filipe Luisin komandası “İnternasyonal” ilə 1:1 hesabına razılaşdı. “Qarabağ”ı yanvarda tərk edən Juninyo “Flamenqo”nun start heyətində meydana çıxdı və 28 yaşlı hücumçu 89 dəqiqə ərzində məhsuldar fəaliyyət göstərə bilmədi.

1-ci tur
Palmeyras - Botafoqo RJ 0:0

Flamenqo - İnternasyonal 1:1
Leo Pereyra, 54 – Bruno Enrike, 34.

San Paulu – Sport Resife 0:0

Kruzeyro – Mirassol 2:1
Dudu, 14. Qabriel Barboza, 22 – Lukas Ramon, 45+3.

Fortaleza - Fluminense 2:0
Lusero, 4. Tinqa, 21.

Qremio - Atletiko Mineyro 2:1
Arezo, 33. Edenilson, 45 – Roni, 75.

Juventude - Vitoriya 2:0
Qabriel Talyari, 8; 51.

Vasku da Qama – Santos 2:1
Nunu Moreyra, 53. Veqetti, 78 – Barreal, 21.

Bayya - Korintians 1:1
Jilberto, 45+1 – Ektor Ernandes, 90.

Braqantino – Seara 2:2
Lakintana, 45+1. E.Ramires, 90+3 – Pedro Raul, 12. Marllon, 23.

Bombardir: Qabriel Talyari (Juventude) - 2.