Almaniyanın 2-ci bundesliqa təmsilçisi "Nürnberq"in maddi çətinliklər üzündən yayda heyətdə ciddi dəyişikliklər edəcəyindən xəbərdarsız.

"Football-plus.az"ın məlumatına görə, "Bild" mövzuyla bağlı yeni bilgilər əldə edib. Belə ki, komandadan ayrılacağı dəqiqləşən futbolçuların adına aydınlıq gəlib. İşin maraqlı tərəfi oyunçulardan bəziləri start heyətinin üzvləridi.

Beləliklə, "Nürnberq" Stefanos Tziması 25 milyon avro qarşılığında "Brayton"a, Yens Kastropu isə 4,5 milyon avro ödəməyə hazır olan "Borussiya"ya satacaq. Klub hələ müştərisi olmayan Kaspar Yanderə 20 milyon avro qiymət qoyub. Həmçinin icarə əsasında komandada forma geyən futbolçularla da yollar ayrılacaq. Bunlar Yanis Antiste, Tim Dreksler və Bərkay Yılmazdı. Maraq üçün qeyd edək ki, hər üç futbolçu "Nürnberq"dən aylıq azı 100 min avro maaş alır.

Bəs, Mahirdən nə xəbər? Onun komandada qalıb-qalmayacağına hələ aydınlıq gəlməyib. O bəllidi ki, Miroslav Kloze heyəti gəncləşdirmək istəyir. "Bild"in iddiasına görə, mütəxəssis artıq "Frankfurt" və "Volfsburq" kimi klubların yetirməsi olan 18-19 yaşlı futbolçularla danışıqlar masasındadı.

Ümumiyyətlə, "Nürnberq" ötən yay fasiləsində 18 futbolçuyla vidalaşıbsa, 15 oyunçu transfer edib. Bu qış kollektivdən ayrılanların sayı 8, yeni gələnlərin sayı isə 4 olub. Yəni klub rəhbərliyi komandada köklü dəyişikliklər etməkdən çəkinmir. Belədə start heyətindəki yerini itirən Mahirin burdakı gələcəyi haqda pozitiv düşünməyə dəyərmi?

KƏNAN BAHADIR