Almaniyanın 2-ci bundesliqa təmsilçisi, Mahir Emrelinin formasını geydiyi “Nürnberq” ciddi maliyyə problemiylə üzləşib.

“Football-plus.az” “Bild”ə istinadla xəbər verir ki, bu barədə klubun illik ümumi yığıncağında məlumat verilib.

“Nürnberq”in İdarə Heyətinin üzvü Niels Rossovun sözlərinə görə, komandanın uğursuz nəticələri böyük maddi itkilərlə nəticələnib. İndi klub 7,4 milyon avro kəsirlə mübarizə aparmaq məcburiyyətindədi. Almaniya nəşrinin əldə etdiyi bilgidə qeyd olunur ki, klubda çalışan əməkdaşların əksəriyyəti ixtisar olunacaq. Həmçinin “Nürnberq” 2024-cü ili də maddi ziyanla başa vuracaq. Ona görə ki, bu il üçün gəlirlər 55,4 milyon avro olubsa, xərclər 56,8 milyon avroya çatıb.

Vəziyyətdən çıxış yoluna gəlincə, klub bir ulduz, bir neçə aparıcı futbolçusunu satmaq istəyir. Bu siyahıda Mahir Emrelinin olub-olmadığını bilmirik. Amma komandada xeyli dəyişikliklərin olacağı bəllidi.

Təbii ki, xilas tədbirləri bununla yekunlaşmayacaq. Klub dekabr ayı ərzində mümkün qənaət tədbirləriylə bağlı layihə hazırlayacaq və ictimaiyyətə təqdim edəcək.

KƏNAN BAHADIR