“Arsenal” qalib gəldi, MY yenə uduzdu - İCMAL
Çərşənbə axşamı premyer-liqada 30-cu turun ilk üç oyunu keçirildi.
Liderin ən yaxın izləyicisi “Arsenal” “Fulhem”i məğlub etməklə xal fərqini ən azı birgünlüyə 9-a endirdi. Favorit hər hissədə bir qol vurdu. Qapıçı Leno fədakarlıq etməsəydi, “bağbanlar” qapısında daha çox qol görəcəkdi. “Topçular”ın bir qədər arxayınlaşdığını görən qonaqlar uzatma dəqiqələrində fərqi azaltdı. “Fulhem” bu oyunda məğlub olsa da, avrokuboklar vəsiqə uğrunda mübarizəni davam etdirir.
“Nottingem Forest” ÇL-ə vəsiqə yolunda daha bir inamlı addım atdı. Evdə MY-ni məğlub edən “meşəçilər” ardıcıl 3-cü qələbəsini qazandı. Oyunun taleyini Elanqanın oyunun əvvəlində vurduğu yeganə qol həll etdi. “Qırmızı şeytanlar” künc zərbəsini hədsiz uğursuz yerinə yetirdi, dərhal əks-hücum quran meydan sahibləri fərqləndi. Ardından oyunboyu gözlənilən mənzərəni izlədik: “Nottingem Forest” topu rəqibə verməklə sıx müdafiə və əks-hücum üslubunda oynadı. MY mövqe hücumları qurmaq baxımından böyük çətinliklərlə üzləşdi.
Amorimin komandası daha çox standart vəziyyətlərə bel bağlayırdı. İlk yarıda Dalotun zərbəsi tirdən döndü. MY 2-ci hissədə də eyni problemi yaşadı. Amorimin əvəzetmələri də qonaqların oyununu gücləndirmədi. Düzdü, uzatma dəqiqələrində MY hesabı bərabərləşdirməyə çox yaxın oldu. Sadəcə, Maquayrın zərbəsindən sonra Murilyo topu boş qapıdan çıxardı.
Çərşənbə axşamı keçirilən daha bir oyunda isə autsayderlər üz-üzə gəldi. “Vulverhempton” “Vest Hem”i məğlub etməklə təhlükəli zonadan bir qədər də uzaqlaşdı.
30-cu tur
Arsenal – Fulhem 2:1
Merino, 37. Saka, 73 – Muniz, 90+4.
Arsenal: Rayya, Timber (Trossar, 78), Saliba, Qabriel (Kivyor, 16), Lüis-Skelli, Edeqor, Parti, Rays, Nvaneri (Saka, 66), Merino, Martinelli.
Nottingem Forest – Mançester Yunayted 1:0
Elanqa, 5.
MY: Onana, Yoro (Maquayr, 88), De Liqt, Mazraui, Dalot, Kazemiro (Eriksen, 59), Uqarte (Heylunn, 46), Dorqu, Fernandeş, Qarnaço, Zirkzee (Maunt, 78).
Vulverhempton – Vest Hem 1:0
Strand Larsen, 21.
1. Liverpul 29 21 7 1 69-27 70
2. Arsenal 30 17 10 3 55-25 61
3. Nottingem F. 30 17 6 7 50-35 57
4. Çelsi 29 14 7 8 53-37 49
5. Mançester S. 29 14 6 9 55-40 48
6. Nyukasl 28 14 5 9 47-38 47
7. Brayton 29 12 11 6 48-42 47
8. Fulhem 30 12 9 9 44-40 45
9. Aston Villa 29 12 9 8 41-45 45
10. Bornmut 29 12 8 9 48-36 44
11. Brentford 29 12 5 12 50-45 41
12. Kristal Pelas 28 10 9 9 36-33 39
13. Mançester Y. 30 10 7 13 37-41 37
14. Tottenhem 29 10 4 15 55-43 34
15. Everton 29 7 13 9 32-36 34
16. Vest Hem 30 9 7 14 33-50 34
17. Vulverhempton 30 8 5 17 41-58 29
18. İpsviç 29 3 8 18 28-62 17
19. Lester 29 4 5 20 25-65 17
20. Sauthempton 29 2 3 24 21-70 9
Bombardirlər: Salah (Liverpul) - 27, Holann (MS) - 21, İsak (Nyukasl) – 19, Vud (Nottingem Forest) - 18, Mbemo (Brentford) – 15.
Növbəti turun oyunları aprelin 5-7-si aralığında keçiriləcək: Everton – Arsenal, Kristal Pelas – Brayton, İpsviç – Vulverhempton, Vest Hem – Bornmut, Aston Villa – Nottingem Forest, Brentford – Çelsi, Fulhem – Liverpul, Tottenhem – Sauthempton, Mançester Yunayted – Mançester Siti, Lester – Nyukasl.
Oyundan sonra
Ruben Amorim, MY-nin baş məşqçisi:
“Erkən qol rəqibə istədiyi oyunu göstərmək imkanı yaratdı. Tez-tez meydanın rəqibə aid hissəsində görünsək də, bizdə ustalıq çatmadı. Düşünürəm ki, imkanları boşa verdiyimizi nəzərə alsaq, həm də bəxtimiz gətirmədi”.
Fakt
“Arsenal”ın 18 yaşlı yarımmüdafiəçisi Nvaneri Merinonun fərqlənməsinə şərait yaratmaqla 2024/25 mövsümündə 10-cu məhsuldar hərəkətini gerçəkləşdirdi. O, cari mövsümdə “böyük beşlik” ölkələrində bu həddə çatan ən gənc 2-ci oyunçudu. “Barselona”nın vingeri Yamal 10 məhsuldar hərəkətə daha tez imza atıb.
Digər xəbərlər
