Yüksək məhsuldarlıq, gözlənilməz nəticələr, 3-cü yerin “əl dəyişməsi”, liderlə əsas izləyicisi arasındakı xal fərqinin yenə azalması – bir sözlə, premyer-liqanın hər turunda futbol adına maraqlı nəsə tapmaq mümkündü. Artıq əminliklə demək olar ki, cari mövsümün sonluğu da dramatik mübarizəyə səhnə olacaq. Lider “Arsenal”la MS arasındakı xal fərqi 4-ə endi, üstəlik “şəhərlilər”in ehtiyatda bir oyunu var və növbəti tur “topçular” “Etihad”a qonaq gedəcək...

“Arsenal” ardıcıl 2-ci turda 2:0 hesabını qoruya bilmədi. Hərçənd “Vest Hem”lə oyun Artetanın komandası üçün çox uğurlu başladı. “Topçular” ilk 10 dəqiqədə iki qol vurandan sonra “çəkicdöyənlər”in darmadağından qurtula bilməyəcəyini düşünənlərin sayı artdı. “Arsenal” təşəbbüsü əldən verməsə də, daha təhlükəli vəziyyətlər yarada bilmirdi. Moyesin yetirmələri isə uzun müddət müdafiə olunmaqla kifayətləndi. 33-cü dəqiqədə Paketaya qarşı kobudluğa görə təyin olunan penalti meydan sahiblərini ümidləndirdi. “Vest Hem” irəli atılsa da, hissənin sonuna qədər başqa qol olmadı. 52-ci dəqiqədə isə artıq “Arsenal” penalti qazandı. Sakanın topu qapının yanından vurması həlledici oldu. Bundan dərhal sonra “çəkicdöyənlər” lideri cəzalandırdı. Bouen hiyləgər və dəqiq zərbə ilə hesabı bərabərləşdirdi. Artetanın ardıcıl əvəzetmələri işə yaramadı. London derbisindəki heç-heçə, təbii ki, ilk növbədə Mançesterin “Siti”yə azarkeşlik edən hissəsini sevindirdi.

Elitada qalmağa çalışan “Lester” Mançesterə yeni çalışdırıcı ilə yollanmışdı, komandaya artıq Din Smit rəhbərlik edir. Onun debütü uğusuz oldu, əslində “tülkülər”in möhtəşəm “Siti”yə problem yaradacağını düşünməyə də dəyməzdi. Qvardiolanın komandası dərhal gücünü göstərdi və ilk yarının ortalarına qədər oyunun taleyini həll etdi. 25-ci dəqiqədə hesab 3:0 oldu: əvvəlcə Stounz fərqləndi, ardından Holann iki qol vurdu. Bu hesab uzun müddət, daha dəqiqi, 75-ci dəqiqəyə qədər dəyişmədi. Künc zərbəsinin ardından fərqi azaldan “tülkülər” sonda irəli atıldı, bir neçə təhlükəli vəziyyət yaratdı, top dirəkdən döndü, Ederson da komandasına qoldan xilas etdi. Qonaqlar məğlubiyyətdən qurtula bilmədi, MS isə “Arsenal”ı izləməkdədi.
Hesabat turu həm də “Mançester Yunayted”in 3-cü pilləni özünə qaytarmasıyla əlamətdar oldu. Mankunianlar “meşəçilər”in öhdəsindən asanlıqla gəldi. Bu hesab qonaqların meydandakı üstünlüyünü tam əks etdirmir. Antoni 32-ci dəqiqədə hesabı açandan sonra da favorit imkanları sağa-sola “xərclədi”. 2-ci hissədə “Nottingem” çox tez yoruldu, əks-hücumlar da təhlükəli deyildi. MY isə uzun müddət Navası məyus edə, fərqi artıra bilmədi. Nəhayət, 76-cı dəqiqədə Dalot bunu bacardı.

Emeri “sükan arxasına” keçəndən sonra “Aston Villa” elə sürət yığıb ki, buna qədər keçirdiyi 5 oyunun hamısında qalib gələn “Nyukasl” da birmingemlilər qarşısında davam gətirmədi. Meydan sahiblərinin dominantlığı artıq 11-ci dəqiqədə hesabda əksini tapdı. Hau 2-ci hissənin əvvəlində iki dəyişikliyə əl atmaqla “sağsağanlar”ı canlandırmaq istədi. Ancaq Uotkins 64-cü dəqiqədə fərqi artırmaqla, demək olar ki, oyunun taleyini həll etdi. 83-cü dəqiqədə elə həmin Uotkins daha bir qol vurdu. Məğlubiyyətsiz oyunlar seriyasını 8-ə çatdıran “Villa” artıq “avrokubok zonası”ndadı və hətta ilk “4-lüy”ə iddiasını da gizlətmir.

Tur London nəhəngləri üçün uğursuz oldu. “Tottenhem” “Bornmut”la oyunda erkən qol vursa da, qonaqlar 1-ci hissənin sonunda və ikincinin əvvəlində iki dəfə fərqləndi. Sona iki dəqiqə qalmış Qruneveld “mahmızlar”ı ümidləndirdi. Amma bu da oyunda son qol olmadı. 5-ci uzatma dəqiqəsində fərqlənən Uattara meydan sahiblərini sarsıtdı.

“Çelsi” də evdə uduzdu və bu oyunda da geridönüş yaşandı. “Brayton” oyunboyu dominantlıq etdi və qələbəyə layiq idi. Baxmayaraq ki, hesabı məhz Lempardın komandası açdı. Erkən qol kimi, fasiləyə qədər iki məcburi dəyişiklik də cənubluları ruhdan salmadı. Veltmanla Ferqyusonun zədələri üzündən meydana çıxan Enkiso ilə Uelbek oyunun taleyini həll etdi. Uelbek oyuna qoşulandan az sonra hesabı bərabərləşdirdi. Fasilədən sonra “Brayton”un təzyiqi bir qədər də artdı. Təkcə bir faktı xatırlatmaq kifayətdi: qonaqlar oyunboyu rəqib qapısına 26 zərbə vurdu. Enkiso 70-ci dəqiqədə uzaq məsafədən zərbə ilə hesabı dəyişdi və “qağayılar” avrokuboklara iddiasını davam etdirməkdədi. “Çelsi” isə belə oyunla heç nəyə iddia edə bilməz.

Turun qalan oyunlarına gəlincə, “Vulverhempton”la “Kristal Pelas” inamlı qələbə ilə elitada qalmaq şansını artırdı. “Fulhem” də sədərdə “Everton”u məğlub etdi.

Turun rəqəmi
32 – cari mövsümdə qol sayını bu həddə çatdıran Holann Salahın 2017/18 mövsümündə 38 oyunluq çempionat üçün müəyyənləşdirdiyi rekordu təkrarladı. Qvardiola fasilədən dərhal sonra onu əvəzləməsəydi, 22 yaşlı norveçli bəlkə İngiltərə çempionatının rekordunu da təkrarlayacaqdı. Holann Endi Koulla (1993/94) Alan Şirerin (1994/95) 34 qolluq rekorduna çatmaq üçün daha iki dəfə fərqlənməlidi.

Turun ulduzu
Olli Uotkins (Aston Villa) – təcrübəli hücumçu komandasının ardıcıl 5-ci qələbəsinə məhsuldar ötürmə və iki qolla töhfə verdi. Güclü “Nyukasl”ı təkbaşına “dəfn etdi”. Cari mövsümdə artıq 14 qol vuran Uotkins bombardirlər cədvəlində də irəliləməkdədi.

Faktlar

* “Arsenal” tarixində ilk dəfə ardıcıl iki premyer-liqa oyununda 2 top üstünlüyünü qoruya bilmədi. “Liverpul”la ötən turdakı oyun da 2:2 bitmişdi. “Arsenal” premyer-liqa tarixinə ardıcıl iki oyunda belə böyük üstünlüyü əldən verən 5-ci komanda kimi düşdü.

* “Aston Villa” premyer-liqada ardıcıl 5-ci qələbəsini qazandı. “Nyukasl”a qədər “Nottingem Forest” (2:0), “Lester” (2:1), “Çelsi” (2:0) və “Bornmut” (3:0) məğlub edilmişdi. Birmingem klubu 1998-ci ildən bəri ilk dəfə premyer-liqada 5 oyunluq qələbə seriyası yaxalayıb.

* Holanna məhsuldar ötürmə verən De Bruyne Avropanın aparıcı çempionatlarında ən yaxşı assistentdi. Belçikalının hesabında cari mövsümdə artıq 15 məhsuldar ötürmə var. “Böyük beşlik” ölkələrində onun ən yaxın izləyicisi Messidi (14). De Bruyne həmçinin minimum 15 məhsuldar ötürmə verdiyi mövsümlərin sayına görə premyer-liqa rekordçusudu. O artıq 4-cü dəfə 15 ötürmə həddinə çatır: 2016/17 – 20, 2017/18 – 17, 2019/20 – 21. Heç bir başqa futbolçu premyer-liqada ikidən artıq belə mövsüm keçirməyib.

* “Çelsi” ev oyununda “Brayton”un 26 qol vurmasına imkan yaratdı ki, bu da London klubu üçün antirekorddu. “Opta Sports”un premyer-liqada uyğun statistikanı apardığı 2003/04 mövsümündən bəri “Çelsi”nin qapısına “Stemford Bric”də bu qədər zərbə vuran olmamışdı.

* MS 2023-də öz meydanında xal itirmir. “Şəhərlilər” il başlayandan bəri çempionat, ölkə kuboku və Çempionlar Liqası çərçivəsində keçirdiyi 11 ev oyununun hamısında qələbə qazanıb. Bu oyunlarda ümumi 40:5 top fərqi qeydə alınıb, “Siti” 7 oyunda qapısını toxunulmaz saxlayıb.