"Neftçi" Misli premyer-liqasının 27-ci tur matçında "Səbail"in meydanından qalib ayrıldı - 2:1.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Sanki komandada narahatlıq var idi...
- Qələbə qazanmağı çox istəyirdik. Millinin oyunlarıyla bağlı fasilə əhval-ruhiyyə baxımından bizə kömək edəcək. Narahatlığın səbəbi qol buraxmağımızla bağlıydı. Birinci hissədə yaxşı oynadıq, hücumlar etdik. İkinci yarıda matçın tələbi dəyişdi. Futbolçular bu sınaqdan da üzüağ çıxdı. Sona kimi mübarizə apardıq. Çempionatdan qopmamaq, fasiləyə yaxşı əhval-ruhiyyəylə yollanmaq baxımından üç xal çox önəmli idi. Bunun öhdəsindən gəldik.

- Sizcə, fasilə komandaya necə təsir edəcək?
- Emin Mahmudov kimi futbolçumuz zədəlidi. Azər Salahlı üçün də vaxt lazımdı. Onların dönüşü üçün fasilə yaxşı təsir edə bilər. Amma hansısa komandanın bu qədər fasiləyə razı olacağını düşünmürəm.

- Bəlkə, qələbədən sonra bu sual sizi kədərləndirəcək. Hər halda, bilmək istəyirəm. "Neftçi" mövsümün sonunda hədəfə çata bilməsə, istefa verəcəksiz?
- İstefa verməliyəm mi, sizcə?

- Avrokuboklara yollana bilməsəz, məncə, yerinə düşər...
- Komandanı beş xalla götürmüşük. İlk 9 oyunda qələbə qazana bilməmişdilər.

- Yəqin ki, siz bu vəzifəyə gələndə hansı yükün altına girdiyinizi bilirdiz...
- Mən yük barəsində danışanda yanımda idiz?

- Demirəm ki, yanınızda idim... "Neftçi"nin avrokuboklara vəsiqə qazanmaması uğursuzluq deyilmi?
- Düzdü, avrokuboklara vəsiqə qazana bilməmək klub üçün uğursuzluqdu. Amma sonra deyirsiz ki, bu qədər məşqçi dəyişməzlər. Deyirsiz, bir məşqçi komandada uzun müddət işləməlidi. Ölkə kubokunda yarımfinal mərhələsinə vəsiqə qazanmışıq. Əvvəl qalib gələ bilmədiyimiz komandaları indi məğlub edə bilirik. Dediklərinizin arxasında nəsə gizlənir.

- Nəsə gizlənmir. Mən sadəcə sual verirəm. İstefa verib-verməyəcəyiniz maraqlıdı...
- Gizlənir. Sizi əmin edirəm ki, gizlənir. Sizin kimilərin dediklərinin arxasında həmişə nəsə gizlənir. Beş oyunda qələbə qazananda məşqçi həmkarımla görüşməyimdən danışırsız. Biz rahatıq. Niyə əlavə mövzu çıxarırsan? Nədi sənin məqsədin?

- Sadəcə, fikrinizi bilmək istəyirəm...
- Hələ çempionatın bitməsinə 9 tur qalıb. Rəhbərliklə danışıqlarımızdan xəbəriniz yoxdu.

- "Neftçi" Dembo Darbo, Yeqor Boqomolski, Alfa Konte, Rafael Quzzo kimi legionerlərlə istəyinə çata bilər?
- Bu haqda yeni mövsümdə fikirləşəcəyik. Bu gün bu barədə danışmaq yersizdi. Bilirik ki, cari mövsümün sonuna qədər bu futbolçularla yola davam etməliyik. Bizdən öndəki bəzi komandalar döyüşməklə yuxarı pillələrə qalxıb. Təbii ki, bəzi mövqelərdə məhz mənim istədiyim cür futbolçular olmalıdı. İndi isə oyunçulardan maksimum istifadə etməliyik.

KƏNAN BAHADIR