Xavi Levandovski ilə vidalaşmaq istəyir?
Bazar ertəsi keçirilən və “Barselona”nın “Real Sosyedad”ı 2:0 hesabıyla məğlub etdiyi oyunun 76-cı dəqiqəsində belə hadisə baş verdi:
ilk yarıda Yamalın vurduğu qolda yaxından iştirak edən Robert Levandovski Ferran Torreslə əvəzləndi. Polşalı hücumçunun bu dəyişiklikdən razı qalmadığı sifət cizgilərindən açıq-aşkar görünürdü. “Barsa”nın baş məşqçisi Xavi Ernandes oyundan sonra qərarını belə izah etdi:
“Sosyedad”la oyunda yüksək təzyiq göstərmək lazım gəldi. Bizdə Ferran Torres və Fermin Lopes var, topa daha çox nəzarət etməliydik. Levandovskinin qəzəbini anlayıram. Məni də əvəzləyəndə xoşuma gəmirdi. Ancaq mən məşqçiyəm, qərar vermək üçün burdayam”.
“CatRadio”nun əməkdaşı Ramon Salmurrinin yaydığı xəbərə görə, Levandovskinin ətrafı belə hesab edir ki, onun “Real Sosyedad”la oyunda əvəzlənməsi hücumçunun komandadan getməli olduğunu güman edən klubun strategiyasıdı. Bu, belə xəbərlərin yayıldığı ilk hal deyil. Belə görünür ki, polşalı hücumçunun ətrafı həqiqətən də düşünür ki, klub onu yayda satmaq üçün özünəməxsus kampaniyaya başlayıb. Levandovski özü isə yalnız gələn mövsüm “blauqrana”da qalmaq istəyir. Onun cari mövsümdə bütün turnirlərdə keçirdiyi 46 oyunda 24 qol vurduğunu, 9 məhsuldar ötürmə verdiyini də xatırladaq.
Digər xəbərlər
