Ramos klubunu yeddi dəfə irəli salıb
Bilindiyi kimi, Serxio Ramos hazırda Meksikada çıxış edir. Məşhur ispaniyalı futbolçu hazırkı klubunu maliyyə cəhətdən əməlli-başlı irəli salıb.
“Monterrey” Serxionu transfer etməklə yüksək məbləğdə qazanc əldə edib. Bu haqda klubun prezidenti Pedro Eskivel “El Financiero” nəşrinə müsahibəsində danışıb. O, “Monterrey”in forma satışının yeddiqat artdığını bildirir:
“Sizə dəqiq rəqəmlər deyə bilmərəm. Amma 3 həftə ərzində normal halda satdığımız formalardan yeddiqat çoxunu satmışıq”.
Yeri gəlmişkən, dünya və Avropa çempionu yeni komandasında qırmızı vərəqə almağa da macal tapıb. “Monterrey” ölkə çempionatının 12-ci turunun səfər oyununda “Pumas”a 3:1 hesabıyla qalib gəlib. Qonaqların müdafiəçisi 90+1-ci dəqiqədə ev sahiblərinin hücumçusu Gilyermo Martinesə qarşı kobudluq edib. Rəqibini yan xəttin yaxınlığında təpikləyən Serxio qarşısında birbaşa qırmızı vərəqə görüb. Onun azı iki oyunluq cəzaya məruz qalacağı gözlənilir.
Xatırladaq ki, 39 yaşlı müdafiəçi “Monterrey”ə fevralda keçib. Bu komandada ilk 5 oyuna 3 qol vuran Ramos daha əvvəl “Sevilya”, “Real” və PSJ-nin formasını geyib.
Digər xəbərlər
