Ramos yeni klubunda niyə “93” nömrəni seçib? - YAZI
Bir neçə gün əvvəl Serxio Ramosun işsizliyə son qoyduğu məlum oldu.
"Football-plus.az" xəbər verir ki, məşhur ispaniyalı futbolçu Meksikada qərar tutub. Halbuki son aylar ərzində ABŞ və Səudiyyə Ərəbistanı klublarından kifayət qədər təkliflər almışdı. Diqqəti cəlb edən digər fakt dünya və Avropa çempionunun yeni klubunda daşıyacağı formanın nömrəsi ilə bağlıdı.
Daim 2014-cü ildəki finalı xatırladacaq
Artıq Ramos rəsmən “Monterrey”in oyunçusudu. Klubun mətbuat xidmətinin məlumatında 38 yaşlı müdafiəçi ilə birillik müqavilə imzalandığı, ulduz futbolçunun bu müddətdə 4 milyon avro maaş alacağı və qazancını bonuslar kimi daha 1 milyon avro artıra biləcəyi bildirilib. Onun yeni komandasında “93” nömrəli formada çıxış edəcəyi də açıqlanıb.
Xatırladaq ki, Ramosun sonuncu klubu “Sevilya” olub. O, daha əvvəl 2003-05-ci illərdə də formasını daşıdığı doğma klubundan ötən yay ayrılmaqla azad agent statusu qazanmışdı. Ulduz futbolçu karyerası ərzində “Real”da (2005-21) və PSJ-də (2021-23) də oynayıb.
Gələk əsas məsələyə. Ortaya təbii sual çıxır: Serxio yeni klubunda niyə “93” nömrəni seçib? Bu suala özü cavab verib. 93 onun Çempionlar Liqasının 2014-cü ildə keçirilən finalının start fitindən 92 dəqiqə 48 saniyə sonra “Real”ın formasında “Atletiko”nun qapısına vurduğu qolun dəqiqə ilə qeydə alındığı göstəricidi. Başqa sözlə, ispaniyalı həmin unudulmaz anı yeni komandasında daim xatırladacaq. Bu haqda “Monterrey”in saytına belə açıqlama verib:
“93-cü dəqiqə finalın ən epik anı idi və bu seçimim həm “Real”a, həm də öz karyerama hörmət əlamətidi. Həmin anı sizinlə, Meksika, “Monterrey” və fanatlarımızla ən yaxşı halda necə bölüşmək olar?”
Serxionun nömrə seçiminə “Real” da reaksiya verib. İspaniya klubunun rəsmi saytında bu cümlələr yazılıb:
“Klubumuzun əfsanəsinin seçdiyi nömrə bizim 93-cü dəqiqəmizdi. Bizim tariximizi dəyişən o anın “Real”ın bütün azarkeşlərinə həsr edilməsidi”.
Madridlilərin italiyalı baş məşqçisi Karlo Ançelotti bu məqama zarafatyana münasibət bildirib və futbolçu həyatının 16 ilini keçirdiyi Ramosa Meksikada uğurlar diləyib:
“Düzünü desəm, onun nə üçün bu nömrəni seçdiyini bilmirəm (gülür). Amma Serxio əfsanədi, ona əbədi olaraq minnətdaram. Ramosa ən xoş arzularımı diləyirəm. Meksika onunla onunla həzz alacaq”.
“AS” ona “93”ü təklif etmişdi
İndi isə qısaca həmin finalı xatırlayaq. 2014-cü ilin finalı mayın 24-də Lissabon şəhərində keçirilirdi. “Atletiko” müdafiəçi Dieqo Qodinin 36-cı dəqiqədə vurduğu qolla Çempionlar Liqasında qələbəyə çox yaxın idi. Lakin Dieqo Simeonenin çalışdırdığı komanda əsas vaxtın sonuna bir neçə saniyə qalmış qələbəni və Çempionlar kubokunu əldən verdi. Daha dəqiq ifadə etsək, 90+3-cü dəqiqədə Ramos hələ də “Real”ın uğurları üçün tər tökən Luka Modriçin künc zərbəsi ilə asmasına başı ilə toxunaraq komandasını uçurumdan xilas etdi. Onun matçda qapıya endirdiyi ilk zərbəsi həlledici oldu. Serxio oyunu əla keçirən Qodini hava mübarizəsində qabaqlayaraq hesabı bərabərləşdirdi. “Real” 30 dəqiqəlik əlavə vaxtda Qaret Beyl, Marselo və Kriştiano Ronaldonun qolları ilə “Atletiko”ya 1:4 hesablı məğlubiyyətin böyük şokunu da yaşatdı.
Serxio əfsanələşən qolunu 2020-ci ilin mayında belə xatırlamışdı:
“Dəqiqə 92:48. Bizim tariximizi dəyişən həmin andan 6 il keçib. Bunu təkrarlamaqdan heç vaxt yorulmayacam. Bu hissdən heç vaxt yorulmayacam”.
Bir maraqlı məqamı da qeyd edək. “AS” finaldan dərhal sonra ona “93” nömrəni seçməyi təklif etmişdi. İspaniyanın populyar idman qəzetində yazılanları olduğu kimi nəzərinizə çatdırırıq:
“Ramosun forma nömrəsini dəyişmək məqamı yetişib. İndi ona “93” yaraşır. Ramos həmişə risk etməyə hazırdı. Tez-tez oyunun məsuliyyətini üzərinə götürür, hərçənd buna görə dəfələrlə tənqid olunub. Amma o, ürəyinin səsinə qulaq asarkən səhvlərə yol versə də, məsuliyyətdən əsla geri çəkilmir”.
Nəhayət, Serxio unudulmaz qolundan təxminən 11 il ötəndən sonra Avropadan çox-çox uzaqda – Meksikada “AS”ın təklifini müsbət cavabladı.
Digər xəbərlər
