''Qalatasaray''ın təcrübəli isimlərindən olan Lukas Torreyra ilə bağlı yenidən transfer şayiələri yayılıb.
''Football-plus.az'' xəbər verir ki, uruqvaylı futbolçunun adı Argentina nəhəngi ''Boka Xuniors'' ilə yanaşı hallanmaqda davam edir.

Buenos-Ayres klubu 29 yaşlı bu yarımmüdafiəçiyə çoxdan maraq göstərir. Bu klubun prezidenti Xuan Roman Rikelmenin Torreyrani transfer etmək istədiyi iddia edilir. Bu günlərdə ''Boka''nın sabiq futbolçusu Serxio Martines ''Torreyra özü də bura gəlməyə can atır. Hər zaman ''Boka''nın maraq dairəsində yer alıb. Amma Avropada böyük pullar qazanır.

''Boka''ya gəlməsi üçün əvvəlcə ciddi bir fədakarlıq etməlidi. Bundan başqa klub ona ciddi bir ödəmə etməlidi. Ortaq məxrəcə gəlmək mümkün olsa, transfer qısa müddətdə tamamlana bilər'' açıqlamasını vermişdi. Bu arada Torreyranın meneceri Pablo Bentankur da son açıqlaması ilə diqqət çəkib. Bilindiyi kimi bu yay 14 iyun - 13 iyul aralığında Klublararası Dünya Çempionatı yeni formatda keçiriləcək. Bentankur bildirib ki, Torreyra həmin turnirdə ''Boka''nın şərəfini qorumağı arzulayır!

Uruqvay yığmasının üzvü ''Cim-Bom''da üçüncü mövsümünü keçirir. Bu mövsüm 38 rəsmi oyunda onun aktivində 1 qol, 7 məhsuldar ötürmə var. İlk iki illə müqayisədə bu ili nisbətən zəif keçirən Torreyranın ''sarı-qırmızılar''la 2026-ya qədər müqaviləsi var. Onun gələcək taleyinə yayda aydınlıq gələcək. Qərarı futbolçu özü verəcək.

İddialara görə ''Qalatasaray'' onu 15 milyon avrodan aşağı məbləğə satmayacaq. Amma Torreyranın qalmaq üçün bir şərti var. O, müqaviləsinin yenilənməsini tələb edir.

Belə görünür, yayda bu mövzu ''Qalatasaray'' rəhbərliyinin başını çox ağrıdacaq.