Edinson Kavani çıxışını hazırkı komandasında davam etdirəcək. “Boka Xuniors” rəhbərliyi təcrübəli futbolçusu ilə müqaviləsini yeniləyib.

Argentina klubunun mətbuat xidmətinin məlumatına görə, 37 yaşlı hücumçu ilə imzalanan yeni sözləşmənin müddəti 2026-cı il dekabrın 31-dək nəzərdə tutulub.

Uruqvaylı futbolçu “Boka Xuniors”da 2023-cü ilin yayından çıxış edir. O, bu müddət ərzində bütün turnirlərdə 43 matç keçirib və 20 qol vurub. Kavaninin Argentina nəhəngi ilə əvvəlki müqaviləsinin müddəti bu ilin sonuna qədər idi.

Edinson Avropada “Palermo”, “Napoli”, PSJ, “Mançester Yunayted” və “Valensiya”dakı çıxışı ilə tanınır.