''Qalatasaray''ın ulduzları ilə bağlı tez-tez ortaya yeni iddialar atılır.

Bir müddət öncə Mauro İkardinin vətəninə qayıtmaq istədiyi və Argentina nəhəngi ''River Pleyt''in onun transferi üçün 15 milyon dollarlıq büdcə ayırması barədə xəbərlər yayılmışdı.

İndi də ''Cim-Bom''un digər aparıcı üzvü Lukas Torreyra haqda bənzər xəbərlər çıxıb. Uruqvaylı yarımmüdafiəçiyə isə Argentinanın digər nəhəngi ''Boka Xuniors'' maraq göstərir. Argentinalı jurnalist Damian Rançesin məlumatına görə artıq futbolçunun meneceri ilə ''Boka Xuniors'' rəsmiləri arasında görüş də keçirilib.

Mənbənin xəbərinə görə ''Boka'' Leandro Paredeslə də maraqlanır. Amma bu iki dayaq yarımmüdafiəçidən məhz Torreyranın keçidi daha real görsənir. Çünki 28 yaşlı futbolçu özü də bu kluba simpatiya bəsləyir.

Torreyra daha öncə də ''Boka Xuniors'' ilə bağlı iddialar gündəmə gələrkən bir gün bu klubda oynamaq istədiyini və ''Qalatasaray''ın böyük ehtimalla onun Avropa karyerasında son klub olacağını dilə gətirmişdi. Onun qardaşının da bununla bağlı paylaşım etməsi iddiaları gücləndirib. Uruqvaylı futbolçunun ''Qalatasaray''la 2026-cı ilə qədər müqaviləsi var. Transfer dəyəri 15 milyon avro civarında olan Torreyra indiyə qədər İstanbul nəhəngində 93 rəsmi oyunda 2 qol, 8 məhsuldar ötürməlik performans sərgiləyib.

ƏLİ