Mourinyonun sabiq köməkçisi bu dəfə onun rəqibi olacaq!
Türkiyə çempionatında 29-cu tura cümə günkü qarşılaşmalarla start veriləcək.
''Football-plus.az'' xəbər verir ki, həmin gün ''Fənərbaxça'' ''Bodrum''un qonağı olacaq. İlk baxışdan superliqada ilk mövsümünü keçirən ''Bodrum'' yalnız elitada qalmaq uğrunda oynayır və bu cütdə aşkar autsayder kimi görsənir. Amma matça maraq qatan bəzi məqamlar var və ''Fənər''in işinin asan olmayacağını indidən söyləmək olar.
Məsələ burasındadı ki, portuqaliyalı Joze Moraiş baş məşqçi vəzifəsinə keçəndən bəri ''Bodrum'' xüsusilə müdafiədə inanılmaz oyun sərgiləyir. Komanda portuqaliyalı mütəxəssisin başçılığı altında keçirdiyi 7 rəsmi oyunun heç birində uduzmayıb (5 qələbə, 2 heç-heçə) və üstəlik bunların heç birində qol buraxmayıb!
Daha bir prinsipial məqam odu ki, Moraiş futbol dünyasında hazırda ''Fənər''in başında olan Joze Mourinyonun köməkçisi kimi populyarlıq qazanıb. Bu ikili daha öncə ''Portu'', ''İnter'', ''Real'' və ''Çelsi''də birlikdə çalışaraq saysız-hesabsız titullar əldə ediblər. İndi onlar ilk dəfə bir-birilərinə rəqib olacaqlar.
Moraiş ''TRT Spor''a açıqlamasında Mourinyoya qarşı dueli barədə bunları deyib:
''İkimiz üçün də duyğusal bir oyun olacaq. Çünki biz demək olar, qardaş kimiyik. Münasibətlərimiz o dərəcədə yaxın olub. Mourinyo faktiki olaraq mənim həyatımı dəyişən insanlardan biridi. Onun mənə yaratdığı fürsət sayəsində uzun illər onunla birlikdə çalışmaq imkanım oldu. Həmin illər mənə çox şey verdi və həyatımı kökündən dəyişdirdi. Bu üzdən Mourinyoya hər zaman minnətdar olacam. Nəticədən asılı olmayaraq onun qəlbimdə yeri ayrı olacaq. Bu oyunun nəticəsi bizim münasibətlərə, dostluğumuza təsir etməyəcək''.
ƏLİ
Digər xəbərlər
