Türkiyə superliqasında çıxış edən ''Bodrum''un yeni baş məşqçisi bəlli olub.

''Football-plus.az'' xəbər verir ki, tarixində ilk dəfə elitada çıxış edən bu klub bir müddət öncə Volkan Dəmirəl ilə yollarını ayırmışdı. Klubdan verilən açıqlamada baş məşqçi vəzifəsinə Joze Moraişin gətirildiyi açıqlanıb.

59 yaşlı portuqaliyalı Moraiş daha öncə ''İnter'', ''Real'' və ''Çelsi''də Joze Mourinyonun köməkçisi qismində çalışıb. Moraiş Türkiyə futbolunu da yaxından tanıyır. Çünki bir müddət ''Antalyaspor''u da çalışdırıb. 2016-cı ildə o, antalyalıların başında 25 rəsmi oyuna çıxmışdı. Türkiyədən ayrıldıqdan sonra AEK, ''Barnsli'', ''Karpatı'', ''Əl-Hilal''ı çalışdıran təcrübəli məşqçi 2022-24-cü illərdə İran təmsilçisi ''Sepahan''ın başında yer almışdı. Bu klub onun dönəmində 88 rəsmi oyuna çıxmış və orta hesabla hər qarşılaşmaya 1,97 xal toplamışdı.

Moraiş yeni klubunda bazar ertəsi debüt edəcək. ''Bodrum'' 23-cü tur çərçivəsində ''Göztəpə''ni qəbul edəcək. Moraişlə hazırda ''Fənərbaxça''nı çalışdıran Mourinyonun dueli isə martın əvvəllərinə təsadüf edəcək.

ƏLİ