''Qalatasaray''ın yeni transferi Viktor Osimhen hazırda Avropanın ən bahalı forvardlarından hesab olunsa da, onun fiziki durumuna dair şübhələr var idi. Çünki nigeriyalı forvard 3 aydan çoxdu, normal məşq etmirdi. Amma Osimhen yığmanın heyətində heç də pis formada olmadığını göstərdi.

Nigeriya sentyabrın 7-də Afrika Millətlər Kubokunun seçmə mərhələsində öz meydanında Beninlə qarşılaşdı və 3:0 hesablı inamlı qələbə qazandı. Oyuna 72-ci dəqiqədə daxil olan Osimhen cəmi 6 dəqiqə sonra fərqlənməklə hesabı 2:0 etdi. Digər iki qolu isə aktivinə ''Atalanta''lı Ademola Lukman yazdı.

Yeri gəlmişkən, Osimhen Nigeriya yığmasında 36-cı oyunda 22-ci qolunu vurdu. O, aktivində 58 oyuna 21 qol olan Yakubu Ayeqbenini geridə qoyaraq Nigeriya yığması tarixinin ən məhsuldar ikinci oyunçusuna çevrildi. Bu siyahıda zirvəyə yerləşmək üçün 25 yaşlı forvard daha 16 qol vurmalıdı. Çünki rekordun sahibi olan Rəşidi Yekininin aktivində 37 qol var.

ƏLİ