Şübhəsiz ki, avrokuboklarda əldə olunan nəticələr bir ölkənin futbolunun ən gözəl aynasıdı.

Avropa futbolunun bir nömrəli turniri Çempionlar Liqası hesab olunur. Amma ''Football-plus.az'' xəbər verir ki, Türkiyə təmsilçiləri son illərdə transferlərə inanılmaz pullar xərcləsələr də, bu turnirdə onların varlığı ilə yoxluğu bilinmir!

''Beşiktaş'', ''Fənərbaxça'', ''Qalatasaray'' və ''Trabzonspor'' Türkiyə futbolunun nəhəngləri hesab olunur. Son 6 mövsümə nəzər salsaq, bu kollektivlər ümumilikdə 376 futbolçu transfer ediblər, 26 fərqli məşqçi ilə çalışıblar və ən əsası yeni oyunçuların alınmasına 2,12 milyard avro xərcləyiblər! Bu müddətdə ''Trabzonspor'' 105 oyunçu alaraq 389 milyon avro, ''Fənərbaxça'' 100 oyunçu alaraq 621,5 milyon avro, ''Qalatasaray'' 92 oyunçu alaraq 640,3 milyon avro, ''Beşiktaş'' isə 79 yeni oyunçu alaraq 473,9 milyon avro xərcləyib!

İndi isə gəlin, bu klubların 2019-dan bu yana Avropa səhnəsindəki ''uğurlarına'' nəzər yetirək. Son 6 mövsümdə bu kollektivlər yalnız 3 dəfə Türkiyəni ÇL-də təmsil ediblər. Bunlardan 2-i ''Qalatasaray''ın, 1-i ''Beşiktaş''ın payına düşür. Bu müddətdə nəhənglər 6 dəfə ÇL-in təsnifatını keçə bilməyiblər. Bu aqibətlə ''Qalatasaray'' 2021/22 və 2024/25-də, ''Fənərbaxça'' 2022/23 və 2024/25-də, ''Trabzonspor'' 2022/23-də, ''Beşiktaş'' isə 2020/21-də üzləşib. Onlara qənim kəsilənlər isə Kiyev ''Dinamo''su, ''Lill'', PSV, ''Yanq Boyz'', ''Kopenhagen'' və PAOK olub.

Göründüyü kimi bunlardan yalnız 1-i ''böyük beşlik'' təmsilçisidi. ÇL-in qrupuna düşənlər isə orda elə nəticələr göstəriblər ki, düşməsələr daha yaxşı idi. 3 fərqli mövsümdə Türkiyə təmsilçiləri ÇL-də ümumilikdə 18 oyun keçiriblər və bunların yalnız 1-də qalib gəliblər (4 heç-heçə, 13 məğlubiyyət)! Həmin yeganə qələbəni ''Qalatasaray'' ötən mövsüm səfərdə ''Mançester Yunayted''lə oyunda əldə edib. ''İstanbul BŞ'' hər nə qədər bu müddətdə bir dəfə çempion olsa da, transfer xərcləri və iddiasına görə hələ ki, nəhəng klub sayılmır. Amma hər ehtimala qarşı onun da ölkə çempionu kimi ÇL-in qrupunda iştirak etdiyini və 6 oyundan 1 qələbə, 5 heç-heçə ilə ayrıldığını xatırladaq.

ÇL-də özünü göstərə bilməyən Türkiyə nəhəngləri səviyyəsinə görə ikinci turnir olan Avropa Liqasında da bu müddətdə 1/8 finaldan irəli gedə bilməyiblər. Bu 6 il ərzində ən yaxşı nəticə Konfrans Liqasının 1/4 finalıdı. ''Fənər'' ötən mövsüm bu turnirdə 1/4-ə qədər irəliləyərək penaltilər seriyasında ''Olimpiakos''a uduzmuşdu.

Yəni 6 il ərzində xərclənilən 2 milyard avro qarşılığında ən böyük uğur yalnız KL-in 1/4 finalıdı!

ƏLİ